شىمكەنت قالالىق پەريناتالدىق ورتالىقتىڭ دارىگەرلەرى جۇكتىلىكتىڭ 39 اپتاسىندا جاتىرى جىرتىلىپ، اۋىر حالدە پەرزەنتحاناعا تۇسكەن انا مەن بالاسىن امان الىپ قالدى.
ايجان ابدۋللاەۆا اۋىر حالدە جەدەل جاردەم قىزمەتىمەن قالالىق پەريناتالدىق ورتالىققا جەتكىزىلگەن. كوپ قان جوعالتقان جۇكتى ايەلدىڭ جاتىرىنداعى تىرتىعى جىرتىلىپ، ىشتەگى بالاسىنىڭ جۇرەك سوعىسى توقتاپ تۇسكەن. انا مەن بالانىڭ ءومىرىن الىپ قالۋ ءۇشىن ورتالىقتىڭ دارىگەرلەرى شۇعىل تۇردە وتا جاساپ، كەسىر تىلىگى ارقىلى بوساندىرىپ الدى.
جاڭا تۋعان شاقالاقتىڭ كىندىك پۋلساتسياسى جوق، جۇرەك سوعۋى باياۋلاپ، تىنىس الماعان. بالالار دارىگەرلەرى سابيگە شۇعىل تۇردە رەانيماتسيالىق كومەك كورسەتىپ، اجالدان اراشالادى. جەتى كۇندەي جاساندى تىنىس الۋ اپپاراتىندا جاتقان ءسابيدىڭ قازىرگى جاعدايى جاقسى.
ال اۋىر حالدە پەرزەنتحاناعا تۇسكەن اناسى 3 كۇن جانساقتاۋ بولىمىندە جاتتى. بىلىكتى دارىگەرلەر ايەلدىڭ جاتىرىن قايتا قالپىنا كەلتىرىپ، ومىرىنە تونگەن قاۋىپتىڭ الدىن الدى.
«ايەلدىڭ جاتىرى جىرتىلىپ كەتكەندىكتەن قاندى كوپ جوعالتقان. بالاسى مەن اناسىن امان الىپ قالۋ قيىن بولدى. بىراق بۇل كۇندەر ارتتا قالدى. قازىر ەكەۋىنىڭ دە جاعدايى جاقسى. ال ايەلدىڭ جاتىرىن ساقتاپ قالدىق. مۇنداي جاعدايدا تۋىلاتىن شاقالاقتار كوپ جاعدايدا شەتىنەپ كەتەدى. بالانىڭ كورەر جارىعى بار ەكەن. بۇعان قوسا پەريناتالدىق ورتالىقتاعى ماماندار جوعارى دەڭگەيدە كومەك كورسەتىپ، ءبىر ەمەس، ەكى جاننىڭ ءومىرىن ساقتاپ قالدى»، - دەگەن پەريناتالدىق ورتالىق باس دارىگەرىنىڭ ورىنباسارى داۋلەت ساتوۆ جۋىق ارادا پەرزەنتحانادان شىعاتىنىن جەتكىزدى.
"ادىرنا" ۇلتتىق پورتالى.
