توقاەۆ ميكروچيپ دايىنداۋ تۋرالى ۇسىنىس تاستادى

3323

مەملەكەت باسشىسى جوعارى ەۋرازيالىق ەكونوميكالىق كەڭەس وتىرىسىندا ميكروچيپ ءوندىرىسىن باستاۋدى ۇسىندى، دەپ حابارلايدى “ادىرنا” ۇلتتىق پورتالى Zakon.kz سايتىنا سىلتەمە جاساپ. 

قاسىم-جومارت توقاەۆ وداقتىڭ ماشينا قۇراستىرۋ سالاسىنا جاڭا بىرلەسكەن كاسىپورىن قاجەتتىگىن ايتتى. الەم بويىنشا ەلەكتروندى قىزمەتتەر مەن ونىمدەرگە سۇرانىس كەيىنگى 3 جىلدان بەرى ارتىپ كەلەدى.

يننوۆاتسيالىق ءارى تەحنولوگيالىق بۇيىمدار جاساۋ سەكتورىندا قىزۋ باسەكەلەستىك ءجۇرىپ جاتىر.

بىراق ميكروچيپ پەن كومپيۋتەرلىك ەلەمەنتتەردىڭ جەتىسپەۋشىلىگى بايقالادى. ونىڭ سالدارىن ءبىزدىڭ ەلدەردىڭ ماشينا قۇراستىرۋ سالاسى كورىپ وتىر. سوندىقتان وداق تاراپىنان وسى سالادا بىرلەسكەن كاسىپورىن قۇرۋ باستاماسى كوتەرىلدى.

قاسىم-جومارت توقاەۆ ۇكىمەتتەردىڭ عىلىمي-زەرتتەۋ ينستيتۋتتارىمەن بىرىگىپ اتالعان جوبانى قولعا الۋ كەرەكتىگىن اتاپ ءوتتى.

ءبىز ءۇشىنشى جىل قاتارىنان تسيفرلىق ءونىم مەن ەلەكتروندى قىزمەتتەرگە ۇلكەن سۇرانىس بارىنا كۋا بولىپ كەلەمىز. بۇل رەتتە ەكسكليۋزيۆتى، يننوۆاتسيالىق تەحنولوگيالىق شەشىمدەرگە عانا ەمەس، قاراپايىم تسيفرلىق شىعىس ماتەريالدارىنا دا كۇرەس بولىپ جاتىر. بۇگىندە الەمدىك نارىقتا كومپيۋتەرلىك ەلەمەنتتەر مەن ميكروچيپتەردىڭ جەتىسپەۋىنەن ماشينا جاساۋدا جۇيەلى كىدىرىستەر بايقالىپ وتىر. بۇل ءبىزدىڭ ەلدەردىڭ ماشينا جاساۋ سالاسىنا دا اسەر ەتەدى. وسىعان بايلانىستى ءبىزدىڭ ۇكىمەتتەرگە عىلىمي-زەرتتەۋ ينستيتۋتتارىنىڭ كومەگىمەن، ماشينا جاساۋ سالاسى ءۇشىن ميكروچيپتەر مەن كومپيۋتەرلىك ەلەمەنتتەر شىعارۋ بويىنشا بىرلەسكەن كووپەراتيۆتى جوبالاردى پىسىقتاۋدى ۇسىنامىن، دەدى قاسىم-جومارت توقاەۆ.

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket