الماتى وبلىسىندا وقۋشىلارى توبەلەسكەن مەكتەپ ديرەكتورى قىزمەتىنەن شەتتەتىلدى. جوعارعى سىنىپتاعى بالالاردان وڭباي تاياق جەگەن 10-سىنىپ وقۋشىسىنىڭ ميى شايقالىپ اۋرۋحانادا جاتىر، دەپ حابارلايدى “ادىرنا” ۇلتتىق پورتالى “استانا” تەلەارناسىنا سىلتەمە جاساپ.
قىلمىستىق ءىس قوزعالىپ، سوتقا دەيىنگى تەرگەۋ باستالدى.
باتپاققا شىلانعان اق كويلەك، باسىن ۇستاپ اقساڭداپ بارا جاتقان بالا. قالعان جىگىتتەردىڭ تازا جۇرگەنىنە قاراعاندا، ىشىنەن ەكەۋى توبەلەسىپ، ءبىرى سوققىنىڭ استىنا قالعان سىڭايلى. بۇل بەينە اناسىنا ءبىرىنشى بولىپ جەتكەن. وڭباي تاياق جەگەن بالاسىن بىردەن تانىپ ۇيىنە جەتىپ بارعان.
"كەلسەم، بالام قۇسىپ جاتىر. ەسىنەن تانىپ، بەتى كوگەرگەن، اۋزى قاناعان. جەدەل جاردەم شاقىردىق. الىپ كەتتى. دياس، المات جانە جاندوس دەگەن بالالاردىڭ ۇرعانىن، اقشا سۇراعانىن ءبىلدىم", - دەيدى بالانىڭ اناسى شولپان جۇماباەۆا.
وقيعا ەسىك قالاسىنا قاراستى راحات اۋىلىنىڭ كىسى اياعى كوپ جۇرمەيتىن كوشەلەرىنىڭ بىرىندە بولعان. بۇل ماڭدا ءۇي يەلەرى ءجيى كەلمەيتىندىكتەن كوبىنە بوس بولادى ەكەن. وقۋشىلار ءبىر-ءبىرىنىڭ اراسىنداعى كيكىلجىڭدى وسى جاقتا شەشەتىن كورىنەدى.
اناسىنىڭ سوزىنشە، بالاسىن قانجوسا قىلىپ تەپكىلەگەندەر №1 مەكتەپتىڭ 11- سىنىبىندا وقيدى ەكەن. تالىمگەرلەرى توبەلەسكەن ءبىلىم ورداسىنا ءبىز دە باردىق. وقۋ ءىسىنىڭ مەڭگەرۋشىسى ديرەكتوردىڭ ورنىندا جوق ەكەنىن ايتىپ، سۇراققا جاۋاپ بەرە المايمىز دەپ باسىن الا قاشتى.
قازىر مەكتەپ ديرەكتورى وقۋشىلار اراسىنداعى توبەلەستى جاسىرعىسى كەلگەنى ءۇشىن جۇمىسىنان شەتتەتىلدى. ا، تاربيە ءىسى جونىندەگى ورىنباسارى ورنىن بوساتتى. ال وسىمەن ءتورتىنشى كۇن اۋرۋحانادا جاتقان بوزبالا قازىر وڭالىپ كەلە جاتىر. الايدا جاردەمحاناعا العاش كەلگەندە ميى شايقالىپ، ەرنى جىرتىلىپ كەتىپتى.
"دياگنوزى: مي زاقىمى، بەتى، كەۋدەسىندەگى بۇلشىق ەتتەرى زاقىمدالعان. ەندى وسىنداي جاعداي بولعاننان كەيىن تۇگەل ەمىن بەرىپ، ۇيىنە شىعارامىز", - دەيدى ەڭبەكشىقازاق كوپسالالى اۋدانارالىق اۋرۋحاناسىنىڭ ءبولىم مەڭگەرۋشىسى احمەد داۆرەشوۆ.
سوققىعا جىعىلعان مەكتەپ وقۋشىسى كەلەسى اپتادا ۇيىنە شىعارىلۋى مۇمكىن. ال پوليتسەيلەر بۇزاقىلارعا قاتىستى سوتقا دەيىنگى تەرگەۋ جۇرگىزىلىپ جاتقانىن ايتادى.
"وقۋشىلار اراسىنداعى جانجال بيىل 6- جەلتوقساندا ەڭبەكشىقازاق اۋدانى راحات اۋىل وكرۋگىندە بولدى. تەكسەرۋ بارىسىندا وقيعا ساباقتان كەيىن ساعات 13:30 شاماسىندا №1 مەكتەپتىڭ 10, 11 سىنىپتارىندا وقيتىن ەكى وقۋشىسىنىڭ اراسىندا بولعان. اتالعان فاكتى بويىنشا قر قك 293-بابى بويىنشا سوتقا دەيىنگى تەرگەۋ امالدارى باستالدى", - الماتى وبلىسى پد وكىلى ەرنار سايديلدين.
قازىر پوليتسەيلەر بۇزاقىلىق بابى بويىنشا تەرگەۋ جۇرگىزىپ جاتىر. ەگەر اقشا بوپسالاماق ماقساتتا جەتكىنشەككە كۇش قولدانعاندارى دالەلدەنسە، 2 جىلعا دەيىن باس بوستاندىعىنان ايرىلىپ، اتا-انالارى 5 ميلليوننان استام ايىپپۇل تولەۋى مۇمكىن.
“ادىرنا” ۇلتتىق پورتالى
