Almaty oblysynda oqýshylary tóbelesken mektep dırektory qyzmetinen shettetildi. Joǵarǵy synyptaǵy balalardan ońbaı taıaq jegen 10-synyp oqýshysynyń mıy shaıqalyp aýrýhanada jatyr, dep habarlaıdy “Adyrna” ulttyq portaly “Astana” telearnasyna silteme jasap.
Qylmystyq is qozǵalyp, sotqa deıingi tergeý bastaldy.
Batpaqqa shylanǵan aq kóılek, basyn ustap aqsańdap bara jatqan bala. Qalǵan jigitterdiń taza júrgenine qaraǵanda, ishinen ekeýi tóbelesip, biri soqqynyń astyna qalǵan syńaıly. Bul beıne anasyna birinshi bolyp jetken. Ońbaı taıaq jegen balasyn birden tanyp úıine jetip barǵan.
"Kelsem, balam qusyp jatyr. Esinen tanyp, beti kógergen, aýzy qanaǵan. Jedel járdem shaqyrdyq. Alyp ketti. Dıas, Almat jáne Jandos degen balalardyń urǵanyn, aqsha suraǵanyn bildim", - deıdi balanyń anasy Sholpan Jumabaeva.
Oqıǵa Esik qalasyna qarasty Rahat aýylynyń kisi aıaǵy kóp júrmeıtin kósheleriniń birinde bolǵan. Bul mańda úı ıeleri jıi kelmeıtindikten kóbine bos bolady eken. Oqýshylar bir-biriniń arasyndaǵy kıkiljińdi osy jaqta sheshetin kórinedi.
Anasynyń sózinshe, balasyn qanjosa qylyp tepkilegender №1 mekteptiń 11- synybynda oqıdy eken. Tálimgerleri tóbelesken bilim ordasyna biz de bardyq. Oqý isiniń meńgerýshisi dırektordyń ornynda joq ekenin aıtyp, suraqqa jaýap bere almaımyz dep basyn ala qashty.
Qazir mektep dırektory oqýshylar arasyndaǵy tóbelesti jasyrǵysy kelgeni úshin jumysynan shettetildi. A, tárbıe isi jónindegi orynbasary ornyn bosatty. Al osymen tórtinshi kún aýrýhanada jatqan bozbala qazir ońalyp kele jatyr. Alaıda járdemhanaǵa alǵash kelgende mıy shaıqalyp, erni jyrtylyp ketipti.
"Dıagnozy: mı zaqymy, beti, keýdesindegi bulshyq etteri zaqymdalǵan. Endi osyndaı jaǵdaı bolǵannan keıin túgel emin berip, úıine shyǵaramyz", - deıdi Eńbekshiqazaq kópsalaly aýdanaralyq aýrýhanasynyń bólim meńgerýshisi Ahmed Davreshov.
Soqqyǵa jyǵylǵan mektep oqýshysy kelesi aptada úıine shyǵarylýy múmkin. Al polıeıler buzaqylarǵa qatysty sotqa deıingi tergeý júrgizilip jatqanyn aıtady.
"Oqýshylar arasyndaǵy janjal bıyl 6- jeltoqsanda Eńbekshiqazaq aýdany Rahat aýyl okrýginde boldy. Tekserý barysynda oqıǵa sabaqtan keıin saǵat 13:30 shamasynda №1 mekteptiń 10, 11 synyptarynda oqıtyn eki oqýshysynyń arasynda bolǵan. Atalǵan fakti boıynsha QR QK 293-baby boıynsha sotqa deıingi tergeý amaldary bastaldy", - Almaty oblysy PD ókili Ernar Saıdıldın.
Qazir polıeıler buzaqylyq baby boıynsha tergeý júrgizip jatyr. Eger aqsha bopsalamaq maqsatta jetkinshekke kúsh qoldanǵandary dáleldense, 2 jylǵa deıin bas bostandyǵynan aırylyp, ata-analary 5 mıllıonnan astam aıyppul tóleýi múmkin.
“Adyrna” ulttyq portaly
