شىمكەنت قالاسىنداعى ونكولوگيالىق ورتالىقتا قاتەرلى ىسىك اۋرۋىن ەرتە ساتىسىندا انىقتاۋ ماقساتىندا سكرينينگ تەكسەرۋلەرى ساپالى ءارى تىڭ ادىسپەن جۇرگىزىلۋدە.
جاتىرداعى ىسىكتى ەرتە انىقتاۋ ءۇشىن ورتالىقتاعى تسيتو-گيستولوگيالىق زەرتحانادا جان-جاقتى تەكسەرىلىپ، ناۋقاستان الىنعان سىناماعا تولىق تالداۋ جاسالادى.
تسيتو-گيستولوگيالىق زەرتحاناداعى سىنامالاردى دايىنداۋ جۇمىستارى بىرنەشە كەزەڭنەن تۇرادى. ەڭ الدىمەن سكرينينگكە كەلگەن ايەلدەر ەمحاناداعى تەكسەرۋ كابينەتىنەن ءوتىپ، جاتىر موينىنان جاعىندى الىنادى. ونى مەديتسينا ماماندارى ارنايى كونتەينەرگە سالىپ، ونكولوگيالىق ورتالىقتاعى تسيتو-گيستولوگيالىق زەرتحاناعا جەتكىزەدى.
تسيتو-گيستولوگيالىق زەرتحاناداعى اۆتوماتتاندىرعىلعان اپپاراتتىڭ كومەگىمەن مەديتسينا ماماندارى جاعىندىنى 1,5 ساعات ىشىندە وڭدەپ، قاجەت ءاناليزدى دايىنداپ شىعارادى.
تسيتو-گيستولوگيالىق زەرتحانانىڭ مەڭگەرۋشىسى تاتيانا تيحونوۆانىڭ ايتۋىنشا، اناليزگە تسيتولوگيا ادىسىمەن سكرينينگكە قابىلدانعان ساتتەن باستاپ، پرەپاراتتى قاراۋعا بەرۋگە دەيىن 1,5 ساعات ۋاقىت كەتەدى.
– تسيتولوگيانى زەرتتەۋدىڭ ءبىرىنشى كەزەڭىندە ءبىز ەمحانا ماماندارىنان اناليزدەردى قابىلداپ، تۇتىكتەگى سىنامالاردى ارنايى سەريالىق نومىرمەن رەت-رەتىمەن بەلگىلەپ شىعامىز. سودان كەيىن تۇتىكتەگى ماتەريالداردى اپپاراتقا ورنالاستىرىپ، شايقاپ شىعارامىز. كەلەسى كەزەڭدە تۇتىكشەدەگى سۇيىق زاتتى تاعى اپپاراتقا ورنالاستىرىپ، تۇتىكتىڭ تۇبىنە تۇسكەنگە دەيىن دايىندالادى. تۇتىكتىڭ تۇبىنە تۇسكەن بۇل ترومب سۇيىق كۇيگە ءتۇسىپ، تۇتىك نەگىزگى اپپاراتقا ورنالاستىرىلادى. وندا كومپيۋتەردىڭ كومەگىمەن اۆتوماتتاندىرىلعان باعدارلاما ارقىلى جاسۋشالىق ماتەريالدارعا اينەككە بوياۋ جاعۋ پروتسەسى باستالادى. بەلگىلى ءبىر ۋاقىتتان كەيىن قۇرىلعى اينەكتى ءوزى بوياپ شىعادى. سودان كەيىن اينەكتە بويالىپ شىققان سىنامانى ميكروسكوپ ارقىلى كورىپ، ىسىكتىڭ بار-جوعىن انىقتايمىز، – دەيدى تسيتو-گيستولوگيالىق زەرتحانانىڭ مەڭگەرۋشىسى.
زەرتحانا مەڭگەرۋشىسىنىڭ سوزىنشە، تسيتولوگيالىق تەكسەرۋ قاتەرلى ىسىك اۋرۋىن عانا ەمەس، گينەكولوگيالىق پاتولوگياداعى بارلىق اۋرۋ ءتۇرىن ەرتە ساتىسىندا انىقتاپ بەرە الادى.
ايتا كەتسەك، بۇگىندە شىمكەنت قالاسىنداعى مەديتسينالىق ۇيىمدار تسيفرلاندىرۋ جۇيەسىنە كوشتى. زەرتحانالىق جۇمىستار، دارىگەرلەردىڭ قىزمەتىن باعالاۋ، ەمدەۋ ادىستەرى جانە تاعى باسقالار، اقپاراتتىق تەحنولوگيالار نەگىزىندە جۇمىس ىستەۋدە.
