تۇركيانىڭ ارنايى قىزمەت وكىلدەرى ەردوعان قاتىسۋعا ءتيىس ميتينگتە تەراكت جاسالماق بولعانىن ايتتى. بيلەۋشى پارتيانىڭ توراعا ورىنباسارى حامزا داگانىڭ سوزىنشە، ارنايى قىزمەت وكىلدەرى كولىكتەردى تەكسەرۋ بارىسىندا بومبانى تاپقان.
«جارىلعىش زات مارديندە جۇمىس ىستەيتىن پوليتسيا كولىگىنە ورناتىلعان. كولىك سيرتكە كەلگەندە ونى جارۋ جوسپاردا بولعان. ولار وسىلايشا ميتينگتى توقتاتىپ، بەيبىتشىلىككە نۇقسان كەلتىرۋدى ويلاعان»، — دەدى حامزا تەلەارنالارعا بەرگەن تۇسىنىكتەمەدە. قازىرگى تاڭدا كۇدىكتىلەردى ىزدەۋ جالعاسۋدا.
ەردوعاندى قولداۋ ميتينگى سيرتتە ءوتتى. ەردوعان ەلدەگى جاعدايدى تۇراقتاندىرىپ، ەكونوميكانى وسىرۋگە ۋادە ەتتى. ساراپشىلار تەراكت جاساپ، ارتىنشا پرەزيدەنتكە شابۋىل جاسالماق بولعان دەيدى. 2018 جىلى تۇركيا ارنايى قىزمەت وكىلدەرى ەردوعانعا بوسنيا جانە گەرتسەگوۆيناعا بارار ساتتە شابۋىل جاسالۋى مۇمكىن ەكەندىگىن ايتقان ەدى.
"ادىرنا" ۇلتتىق پورتالى
