جۋىردا كسرو حالىق ءارتىسى جانە حالىق قاھارمانى روزا باعلانوۆانىڭ ءومىرى تۋرالى سىر شەرتەتىن تەلەحيكايا كورەرمەنگە جول تارتادى دەپ حابارلايدى "ادىرنا" ۇلتتىق پورتالى.
— 2022 جىلى 1 قاڭتاردا اتى اڭىزعا اينالعان كسرو حالىق ءارتىسى جانە حالىق قاھارمانى روزا باعلانوۆانىڭ تۋعانىنا 100 جىل تولادى. وسى ورايدا "حابار" ارناسى ءانشىنىڭ ونەگەلى ءومىرىنىڭ جارقىن ساتتەرى مەن قيلى كەزەڭدەرىن باياندايتىن "بۇلبۇل" تەلەحيكاياسىن كورەرمەن نازارىنا ۇسىنادى", – دەلىنگەن "حابار" ارناسىنىڭ حابارلاماسىندا.
تەلەحيكايادا بۇلبۇل ءۇندى ءانشىنىڭ شىعارماشىلىق ءومىرى عانا ەمەس، ازاماتتىق ۇستانىمى بار قايراتكەرلىك قىرىنا دا ءمان بەرىلگەن. روزا تاجىبايقىزىنىڭ قيىن بالالىق شاعى، وتباسىلىق ءومىرى، تاشكەنت توقىما ينستيتۋتىندا وقۋى جانە مايدان دالاسىندا ونەر كورسەتۋى تەلەحيكايا بارىسىندا تىزبەكتەلە تۇسەدى.
ايتا كەتۋ كەرەك، بيىل مادەنيەت جانە سپورت ءمينيسترى اقتوتى رايىمۇلوۆا 2022 جىلى ايگىلى ءانشى روزا باعلانوۆانىڭ 100 جىلدىق مەرەيتويىن دايىنداۋ جانە وتكىزۋ ءۇشىن جالپىرەسپۋبليكالىق جوسپار ەنگىزىلگەنىن حابارلاعان بولاتىن.
"ادىرنا" ۇلتتىق پورتالى.
