ياكۋتيادا قۇرىلعان دۇنيەجۇزىلىك مامونت ورتالىعى ەجەلگى جانۋارلاردى تىرىلتەتىن بولادى. بۇل تۋرالى تابيعي جانە مادەني مۇرانى قولداۋ جانە ساقتاۋ جونىندەگى "مامونت ەففەكتىسى" قورىنىڭ پرەزيدەنتى ەكاتەرينا كۋزمينا مالىمدەدى دەپ حابارلايدى "ادىرنا" ۇلتتىق پورتالى "Lente.ru" سايتىنا سىلتەمە جاساپ.
رەسەي پرەزيدەنتى ۆلاديمير ءپۋتيننىڭ جارلىعىمەن ورتالىق 2035 جىلعا دەيىنگى اركتيكالىق ايماقتى دامىتۋ جانە ۇلتتىق قاۋىپسىزدىكتى قامتاماسىز ەتۋ ستراتەگياسىنا ەنگىزىلگەن. ورتالىقتا عىلىمي-زەرتحانالىق كەشەن، مامونت فاۋناسىنىڭ كريوستوراجى، مۇراجاي-كورمە كەشەنى، سونداي-اق "مۇز ءداۋىرى ساياباعى" عىلىمي-زەرتتەۋ الاڭى بولادى.
قور پرەزيدەنتى ەكاتەرينا كۋزمينانىڭ ايتۋىنشا، ماماندار "مامونت ەففەكتىسى" قورى، رەسەي عىلىم اكادەمياسىنىڭ ءسىبىر بولىمشەسى، ياكۋتيا عىلىم اكادەمياسى جانە Artembryogen Engineering كومپانياسىنىڭ "سكولكوۆو" رەزيدەنتى اراسىنداعى كەلىسىم بويىنشا مامونت دنق-سىن زەرتتەمەك.
ءبىرىنشى كەزەڭدە عالىمدار وسىرۋگە جانە گەنەتيكالىق ماتەريال رەتىندە پايدالانۋعا جارامدى ۇلپالاردى الادى، سوماتيكالىق جاسۋشا مەن ەنۋكلەاتسيالانعان جۇمىرتقانى بىرىكتىرۋ ارقىلى رەكونسترۋكتسيالانعان كلوندىق ەمبريوندى جاسايدى دەپ جوسپارلانۋدا. ول ءۇشىن جانۋارلاردىڭ ۇقساس تۇرلەرىنىڭ جۇمىرتقالارى قاجەت بولادى. وسى ماقساتتا مامونتتارعا ۇقساس پىلدەر الىنۋى مۇمكىن.
"بۇل باتىل، بىراق ورىندالاتىن مىندەت", - دەدى ول. بۇعان دەيىن امەريكالىق عالىمدار ياكۋتيادا مامونتتاردى ءتىرىلتۋ جوسپارى تۋرالى ايتقان بولاتىن.
امەريكا قۇراما شتاتتارىنىڭ Colossal Biosciences كومپانياسى رەسەيدە مامونتتى ءتىرىلتىپ، وسىرگىسى كەلدى. ەكسپەريمەنت جۇرگىزۋگە اتاقتى عالىم دجوردج چەرچ تاعايىندالدى.
ونىڭ ايتۋىنشا، جويىلىپ كەتكەن جانۋارلاردىڭ تۇرلەردىڭ قايتا ءتىرىلتۋ ورمانداردى قالپىنا كەلتىرۋگە، سونداي-اق اركتيكالىق شابىندىقتاردى جانداندىرۋعا كومەكتەسەدى.
امەريكالىقتار ءتورت-التى جىلدان كەيىن ەڭ ءبىرىنشى جانۋاردى الىپ كەتۋدى جوسپارلاپ وتىر. ال ياكۋت بيلىگى جويىلعان جانۋارلاردىڭ كلوندارىن جەرگىلىكتى پلەيستوتسەن ساياباعىنا ورنالاستىرۋدى كوزدەيدى.
"ادىرنا" ۇلتتىق پورتالى
