مەرەكە قارساڭىندا اقتاۋدا تاعى ءبىر ساۋلەتتى نىسان پايدالانۋعا بەرىلدى،-دەپ حابارلايدى "ادىرنا" ۇلتتىق پورتالى اقتاۋ قالاسى اكىمىنىڭ ءباسپاسوز قىزمەتىنە سىلتەمە جاساپ.
وبلىس ورتالىعىنا كىرە بەرىس تۇستا بوي كوتەرگەن نىساننىڭ سىرتقى قاسبەتىنىڭ بەزەندىرىلۋى ۇلتتىق ەرەكشەلىكتەرگە تولى.
ونىڭ ورنالاستىرىلعان كومپوزيتسيالارى مەن مۇسىندەرىنىڭ قيسىندى ءتۇيىنى بار. سالتانات قاقپاسىنىڭ الدىڭعى بەتىندە قازاقتىڭ قوس قارياسى نەمەرەلەرىمەن بىرگە تۇرعان مۇسىندەر ورناتىلعان. اجەيدىڭ قولىنداعى ۇرشىقتان يىرىلگەن ءجىپ ارقىلى نەمەرەسىمەن بايلانىستىرىلعان. وسىلايشا وتباسى قۇندىلىعى دارىپتەلگەن.
قاقپانىڭ وڭ جانە سول قابىرعالارىندا قازاق حاندىعىنان سىر شەرتەر «تايقازان»، حاندار مەن باتىرلار جانە قازاقتىڭ ءۇش ءبيى، تاۋەلسىز ەلدىڭ نىشاندارىنا اينالعان «التىن ادام»،«قازاق ەلى» مونۋمەنتتەرى مەن ەلوردامىزدىڭ سيمۆولدارى بەينەلەنگەن بەدەرلى مۇسىندەرى ورنالاسقان.
ال، قاقپانىڭ ەكىنشى كىرە بەرىسىندە قولىندا ەر-توقىمى بار قازاق جىگىتى مەن توستاقانى بار ۇلتتىق كيىمدەگى قازاقتىڭ بويجەتكەنىنىڭ ءمۇسىنى تۇرعىزىلعان. بۇل قازاق ەلىنىڭ قوناقجايلىعىن بەينەلەپ تۇر.
قاقپانىڭ ءتورت بۇرىشىنا ورناتىلعان جارىق شامدارى دا - قول تۋىندىلارى.
قازاقستان تاۋەلسىزدىگىنىڭ تورقالى تويىنىڭ قۇرمەتىنە ايشىقتى ساۋلەت نىسانىن سالۋ جۇمىستارى جەرگىلىكتى كاسىپكەرلەردىڭ قولداۋىمەن جۇزەگە اسقان. جوبالىق ەسكيزىنىڭ اۆتورى جانە مۇسىندەۋشى، سۋرەتشىلەر وداعىنىڭ مۇشەسى - دانيار قاليەۆ.
دانيار قاليەۆ بۇعان دەيىن وبلىستاعى بىرنەشە ساۋلەت نىساندارىنىڭ بوي كوتەرۋىنە ۇلەس قوستى.
"ادىرنا" ۇلتتىق پورتالى
