ماڭعىستاۋ وبلىسىنىڭ اكىمى نۇرلان نوعاەۆ جەرگىلىكتى اتقارۋشى ورگاننىڭ وڭىردەگى اۋىزسۋ تاپشىلىعى ماسەلەسىن شەشۋ ءۇشىن قابىلداپ جاتقان شارالارىنا توقتالدى، دەپ حابارلايدى «ادىرنا» ءتىلشىسى baq.kz-كە سىلتەمە جاساپ.
وبلىستىڭ دامۋى مەن حالىق سانىنىڭ قارقىندى وسۋىنە وراي وڭىردە سۋعا دەگەن سۇرانىس ارتىپ كەلەدى. بۇگىنگى كۇنى وبلىس 150 مىڭ تەكشە مەتر سۋ تۇتىنادى. جاز مەزگىلىندە 51 مىڭ تەكشە مەتر سۋ تاپشىلىعى بايقالادى. 2025 جىلعا قاراي سۋعا دەگەن قاجەتتىلىك 250-260 مىڭ تەكشە مەترگە جەتەدى دەگەن بولجام بار. پرەزيدەنتتىڭ حالىقتى تازا اۋىزسۋمەن قامتاماسىز ەتۋ جونىندەگى تاپسىرماسىن ورىنداۋ اياسىندا وبلىستا 2025 جىلعا دەيىن جالپى قۋاتى 286 مىڭ تەكشە مەتر سۋدى تۇشىتاتىن 9 جوبانى ىسكە اسىرۋ جوسپارلانۋدا،-دەدى ول.
ونىڭ سوزىنشە، بيىل قاراجانباس كەن ورنىندا قۋاتى تاۋلىگىنە 17 مىڭ تەكشە مەتر سۋ تۇشىتاتىن زاۋىت ىسكە قوسىلادى. ينۆەستيتسيالىق جوبانىڭ قۇنى - 21,4 ملرد.تەڭگە. زاۋىت پايدالانۋعا بەرىلگەننەن كەيىن «استراحان-ماڭعىستاۋ» سۋ قۇبىرى ارقىلى كەلىپ تۇسەتىن 10 مىڭ تەكشە مەتر سۋ جاڭاوزەن قالاسىنا، بەينەۋ جانە جەتىباي اۋىلدارىنا جىبەرىلەدى.
سونداي-اق، اكىمنىڭ مالىمدەۋىنشە، «كاسپي» سۋ تۇشىتۋ زاۋىتىنىڭ قۋاتىن 20 مىڭنان 40 مىڭ تەكشە مەترگە دەيىن جەتكىزۋدىڭ 2-ءشى كەزەڭى باستالدى.
بۇل جۇمىستار 2022 جىلى اياقتالادى. جەرگىلىكتى اتقارۋشى بيلىك اتالعان زاۋىت وندىرەتىن سۋ كولەمىن تاۋلىگىنە 100 مىڭ تەكشە مەترگە دەيىن جەتكىزۋدى كوزدەپ وتىر. قازىر 3-ءشى كەزەڭىن جۇزەگە اسىرۋ ءۇشىن جوبالىق سمەتالىق قۇجاتتاماسى ازىرلەنۋدە. جاڭاوزەن قالاسىن تولىقتاي سۋمەن قامتاماسىز ەتۋ ءۇشىن كەندىرلى ايماعىندا تاۋلىگىنە 50 مىڭ تەكشە مەتر سۋ تۇشىتۋ زاۋىتى سالىنىپ جاتىر. «قازمۇنايگاز» كومپانياسى جۇزەگە اسىرىپ جاتقان جوبا 2024 جىلى ىسكە قوسىلادى دەپ جوسپارلانۋدا، - دەدى ماڭعىستاۋ وبلىسىنىڭ اكىمى.
ول «ماەك-قازاتومونەركاسىپ» كومپانياسى اۋماعىندا تاۋلىگىنە 24 مىڭ تەكشە مەتر سۋ تۇشىتاتىن قوندىرعى سالىناتىنىن اتاپ ءوتتى.
فورت-شەۆچەنكو قالاسىندا قۋاتى تاۋلىگىنە 5 مىڭ تەكشە مەتر سۋ، اقشۇقىر اۋىلى مەن سايىن شاپاعاتوۆ اۋىلدىق وكرۋگىندە قۋاتى تاۋلىگىنە 10 مىڭ تەكشە مەتر سۋ بولاتىن قوندىرعى سالىنادى. ال بەينەۋ اۋدانىنىڭ بورانقۇل اۋىلىندا تاۋلىگىنە 80 مىڭ تەكشە مەتر سۋ وندىرەتىن زاۋىت سالۋ جوسپارلانۋدا. اقتاۋ قالاسىندا قۋاتى تاۋلىگىنە 20 مىڭ تەكشە مەتر تەڭىز سۋىن تۇشىتاتىن زاۋىتتىڭ قۇرىلىسى باستالدى، - دەيدى ن.نوعاەۆ.
سونىمەن قاتار نوعاەۆ پرەزيدەنت 2022 جىلعا دەيىن 12 اۋىلدى ورتالىقتاندىرىلعان سۋمەن قامتاماسىز ەتۋدى تاپسىرعانىن ايتتى.
بيىل ورتالىقتاندىرىلعان سۋمەن 2 اۋىل قامتىلادى: بەكى جانە باسقۇدىق. ناتيجەسىندە ەلدى مەكەندەردى ورتالىقتاندىرىلعان اۋىزسۋمەن قامتاماسىز ەتۋ 96% - عا دەيىن جەتكىزىلەتىن بولادى. قالعان 10 اۋىلدى اۋىزسۋمەن قامتۋدى 2022 جىلدىڭ سوڭىنا دەيىن اياقتاۋ جوسپارلانۋدا، - دەدى وبلىس باسشىسى.
اكىمنىڭ ايتۋىنشا، مەملەكەت باسشىسى ماڭعىستاۋ وبلىسىنىڭ الەۋمەتتىك-ەكونوميكالىق دامۋى بويىنشا وتكەن كەڭەستە وڭىردەگى اۋىزسۋ تاپشىلىعىن شەشۋ ءۇشىن ناقتى تاپسىرمالاردى جۇكتەگەن بولاتىن.
ءبىز بەلسەندى جۇمىستى باستادىق، ينۆەستورلارمەن كەلىسسوزدەر جۇرگىزۋدەمىز، باسقا ەلدەردىڭ تاجىريبەسىن زەردەلەۋدەمىز. بۇگىنگى تاڭدا ماڭعىستاۋ وبلىسىندا اۋىزسۋ تاپشىلىعى ماسەلەسىن شەشۋ ءبىزدىڭ باستى مىندەتىمىز بولىپ تابىلادى، - دەپ اتاپ ءوتتى نۇرلان نوعاەۆ.
«ادىرنا» ۇلتتىق پورتالى
