بيىل جازدا جاڭا باسپانا العان ريددەردەگى ورتتەن زارداپ شەككەن تۇرعىندار بەرىلگەن ۇيلەردىڭ جاعدايىنا شاعىمدانۋدا، دەپ حابارلايدى "ادىرنا" ۇلتتىق پورتالى "BaigeNews.kz-كە" سىلتەمە جاساپ.
— كۇزدىڭ سوڭى بارىمىزگە توبەدەن اققان سۋ تۇرىندە ۇلكەن "توسىن سىي" اكەلدى. جيھازدار، تۇرمىستىق تەحنيكا جانە جەكە زاتتار ءبۇلىندى. وسىلايشا ءومىر ءسۇرىپ جاتىرمىز. ال جولداردى تازالاي ما، ول دا ۇلكەن ماسەلە. اۆتوبۋس جۇرمەيدى، ادامدار قالاعا قاردى كەشىپ جاياۋ بارۋعا ءماجبۇر، - دەيدى مارينا بوريسيۋك.
مامىر ايىنداعى ورتتەن كەيىن رەكوردتىق مەرزىمدە سالىنعان جاڭا اۋداننىڭ تۇرعىندارى ورتاق چاتتا ءوز تۇيتكىلدەرىمەن بولىسكەن: "قازىر بارىمىزدە دە وسى ماسەلە. شاتىردان قاردى كۇرەكپەن تازالايمىز، قۇرىلىسشىلار بارلىق ماتەريالدى قۇرتتى، ءۇيدى ەشكىم قابىلداپ العان جوق، كوميسسيا كەلمەدى. مىنە، ناتيجەسىندە ءبىزدىڭ قانشالىقتى "باقىتتى" كۇي كەشىپ جاتقانىمىزدى بۇكىل ەل بىلەدى. ەلەكتر سىمدارى سۋلانىپ تۇر، بولاشاقتا تاعى دا ءورت بولماسىنا كىم كەپىل بەرەدى؟".
ەسكە سالايىق، 2021 جىلدىڭ 10 مامىرىندا ريددەر ورمان شارۋاشىلىعى كاسىپورنىنىڭ اۋماعىندا ورنالاسقان اۋىلعا بولعان ءورتتىڭ سالدارىنان ءبىر ادام قازا تاۋىپ، تاعى ەكى ادام اۋىر كۇيىكپەن اۋرۋحاناعا جەتكىزىلگەن بولاتىن. ءورت بىرنەشە ونداعان ءۇيدى قيراتىپ، كوپتەگەن وتباسى باسپاناسىز قالدى.
شىعىس قازاقستان وبلىسىنىڭ اكىمى دانيال احمەتوۆ بارلىق ورتتەن زارداپ شەككەندەردىڭ باسپانا ماسەلەسىن شەشۋگە، سونداي-اق ولارعا وتەماقى تولەۋگە ۋادە بەردى. ءۇش ايدىڭ ىشىندە باسپاناسىنان ايىرىلعان 32 وتباسى تۇگەلدەي باسپانالى بولىپ، قالاشىق بوي كوتەردى.
ريددەرلىكتەر جاڭا ۇيلەرگە شىلدە ايىنىڭ اياعىنان باستاپ قونىستانا باستادى، ال سوڭعى پاتەر يەلەرى تامىز ايىنىڭ ورتاسىندا كىلتتەرىن الدى. ورتتەن زارداپ شەككەندەردىڭ بارلىعى كورسەتىلگەن كومەككە ريزا بولعانىمەن، ولاردىڭ كوپشىلىگى بىرقاتار سەبەپتەرگە بايلانىستى نارازى بولدى: كەيبىر ۇيلەردە جەلدەتكىش جوق، ەلەكتر جارىعى ءسونىپ قالا بەرەدى، سونىمەن قاتار سۋمەن قامتاماسىز ەتۋدە بىرقاتار قيىندىقتار بار.
"ادىرنا" ۇلتتىق پورتالى
