يندۋستريا جانە ينفراقۇرىلىمدىق دامۋ مينيسترلىگىنىڭ جانە جەرگىلىكتى اتقارۋشى ورگانداردىڭ جولاۋشىلار جانە جۇك تاسىمالىن دامىتۋ باعىتىنداعى جۇمىسى كوڭىل كونشىتپەيدى. بۇل تۋرالى «Nur Otan» پارتياسى پارتيالىق باقىلاۋ كوميتەتىنىڭ كەزەكتى وتىرىسىندا بەلگىلى بولدى.
قازاقستان اۆتوموبيل كونۆەنتىنىڭ پرەزيدەنتى مارات بەرقاليەۆتىڭ ايتۋىنشا، زاڭ جەرگىلىكتى اتقارۋشى ورگانداردى تاسىمالداۋشى كومپانيالاردىڭ شىعىندارىن سۋبسيديالاۋعا مىندەتتەگەنىمەن، كوپتەگەن وڭىرلەر بۇل تالاپتى ورىنداۋعا اسىعار ەمەس. ناتيجەسىندە، تاسىمالداۋشىلارعا اينالىم قاراجاتى جەتىسپەي، كولىك جۇرگىزۋشىلەر مەن مەحانيكتەرگە جالاقى تولەي الماي، سونىڭ سالدارىنان ۇنەمى مامان تاپشىلىعىنا تاپ بولىپ وتىر. ال اۆتوپاركتى جاڭارتىپ العاندارعا ليزينگتىك تولەمدەرگە اقشا جەتپەيدى.
جيىن بارىسىندا پارتيالىقتار وڭىرلەردەگى قوعامدىق كولىكپەن بايلانىستى ماسەلەلەرگە دە توقتالدى. ماسەلەن، جەزقازعاندا «بەكبولاتساي» شاعىناۋدانىنىڭ 3 مىڭ تۇرعىنى اۆتوبۋس قاتىناسىسىز قالعان. قىزىلوردا تۇرعىندارى اۆتوبۋستاردىڭ قاتىناۋ كەستەسىنىڭ وتە ىڭعايسىزدىعىنا شاعىمدانادى. مۇندا ورتالىق كوشەلەردە مارشرۋتتار قايتالانسا، ال شالعاي اۋداندارعا قاتىنامايدى.
تاعى ءبىر وزەكتى ماسەلە – بەلگىلەنگەن وستىك جۇكتەمەدەن اساتىن اۋىر جۇك كولىكتەرىنىڭ جول توسەمىن مەرزىمىنەن بۇرىن بۇزۋى.
«ماڭعىستاۋ وبلىسىنىڭ شەتپە اۋىلىندا ەكى جىل بۇرىن جول جوندەلىپ ەدى. بىراق كارەرلىك ساموسۆالدار سول جولداردى تىپ-تيپىل ەتتى. ەندى ونى قايتا جوندەۋ قاجەت، وعان رەسپۋبليكالىق بيۋدجەتتەن تاعى 800 ملن. تەڭگە ءبولىندى. قازىرگى ۋاقىتتا ەلىمىزدەگى جولداردىڭ تەك 9,3%-ى ءبىر وسكە 10 توننادان استام اۋىرلىققا شىداس بەرە الادى. وسى ماسەلەنى شەشۋگە ءتيىستى دەڭگەيدە كوڭىل بولىنبەي كەلەدى»، - دەدى كوميتەت مۇشەسى داۋرەن بيجۇمانوۆ.
نۇروتاندىقتار ترانزيتتىك اۆتوجولداردىڭ ساپاسىنا ەرەكشە نازار اۋداردى. كوميتەتتە اتاپ وتكەندەي، ورىنبور، چەليابينسك، قورعان، ومبى، ءجاڭاسىبىر باعىتىنداعى اۆتوجولداردىڭ باسىم بولىگى زاماناۋي ستاندارتتارعا سايكەس كەلمەيدى. مەردىگەرلەر جول سالۋ جانە جوندەۋ كەزىندە ۇشىراساتىن پروبلەمالاردىڭ ءبىرى – جول-قۇرىلىس ماتەريالدارىنىڭ قىمباتتاۋى.
جوعارىدا ايتىلعانداردى ەسكەرە وتىرىپ، كوميتەت يندۋستريا جانە ينفراقۇرىلىمدىق دامۋ مينيسترلىگىنە جولداردى ورتاشا جوندەۋ ءۇشىن تەحنيكالىق قۇجاتتامانىڭ ساراپتاماسىن اككرەديتتەلگەن ۇيىمدارعا بەرۋدى، جولداردى ورتاشا جوندەۋدىڭ 1 شاقىرىمىنا جۇمسالاتىن شىعىندار ءليميتىن بەلگىلەۋدى، سونداي-اق كەلەسى جىلدىڭ 1 قاڭتارىنا دەيىن بارلىق اۆتوجولدار جاي-كۇيىنىڭ بىرىڭعاي كارتاسىن جاساۋدى ۇسىندى.
سونىمەن قاتار، پارتيالىق باقىلاۋ كوميتەتى جۇمىسىندا جىبەرگەن ولقىلىقتارى ءۇشىن «قازاۆتوجول» ۇك» اق باسقارما توراعاسى اسقار مۇراتۇلىنا «ەسكەرتۋ»، تەمىرتاۋ قالاسىنىڭ اكىمى قايرات بەگىموۆكە، ماڭعىستاۋ وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادايبەك قاليەۆكە «سوگىس» تۇرىندەگى پارتيالىق جاۋاپكەرشىلىككە تارتۋ تۋرالى قاۋلى شىعاردى.
يندۋستريا جانە ينفراقۇرىلىمدىق دامۋ مينيسترىنە اۆتوموبيل جولدارى كوميتەتىنىڭ توراعاسى تولەگەن ابدۋللين مەن كولىك كوميتەتىنىڭ توراعاسى سامات گيليموۆقا تارتىپتىك جازا قولدانۋ ۇسىنىلدى.
