شىمكەنت قالاسىندا ۇلكەن ماگيسترالدى كوشەلەرگە ۆەلوجولاقتار سالىنىپ، «Shymkent bike» جوباسى ىسكە قوسىلماق. بۇل جۇمىستار تولىعىمەن اياقتالعاندا، تۇرعىندار ۆەلوسيپەدتى قوعامدىق كولىك رەتىندە پايلانا الادى، دەپ حابارلايدى قازاقپارات ءتىلشىسى.
اتاپ ايتقاندا «Shymkent bike» الەۋمەتتىك-يننوۆاتسيالىق جوباسى شەڭبەرىندە 200 ۆەلوسيپەدتى قۇرايتىن 40 ۆەلوستانتسيا ىسكە قوسىلۋعا دايىن تۇر. الداعى 1,5-2 ايدىڭ كولەمىندە ۆەلوسيپەدتەر تۇرعىندار يگىلىگىنە بەرىلەدى دەپ كۇتىلۋدە. جوبا اياسىندا پايدالانۋشىلار ءۇشىن قولجەتىمدى جانە ىڭعايلى تاريفتىك جوسپارلار ازىرلەنگەن. «Bike Sharing» جۇيەسى ارقىلى تۇرعىندار مەن قالا قوناقتارى ۆەلوسيپەدتى جالعا الۋدىڭ العاشقى 30 مينۋتىندا تەگىن ايداي الادى. ياعني، ۆەلوسيپەدتەردى جاقىن ورنالاسقان ستانتسيالاردا الماستىرىپ، ۇزاق ۋاقىت بويى تەگىن قولدانۋعا مۇمكىندىك بولادى. ال، ابونەنتتىك تولەمدەردىڭ قۇنى ساعاتى مەن مەرزىمىنە قاراي 100 تەڭگەدەن باستالىپ، 10 مىڭ تەڭگەگە دەيىن بەلگىلەنگەن.
