15 قىركۇيەكتەن باستاپ قازاقستاندا مەديتسينالىق ۇيىمدارعا تىركەۋ ناۋقانى باستالادى. شارا قاراشانىڭ 15-ىنە دەيىن جالعاسادى.
بيىل شەتەل ازاماتتارى مەن ەڭبەك ميگرانتتارى ءۇشىن ەمحاناعا تىركەۋ ەرەجەسى وزگەردى. تامىزدىڭ 15-ىنەن باستاپ اتالعان ساناتتاعى ازاماتتاردا ەرىكتى مەديتسينالىق ساقتاندىرۋ كەلىسىم شارتى بولۋى مىندەتتەلگەن.
جاڭا ەرەجەلەرگە سايكەس، ەلىمىزگە ۋاقىتشا كەلگەن ازاماتتىعى جوق شەتەل ازاماتتارى نەمەسە پانا ىزدەۋشىلەردى ەمحانالارعا تىركەۋ ەرىكتى مەديتسينالىق ساقتاندىرۋ كەلىسىم شارتى نەگىزىندە جۇرگىزىلەدى. مەديتسينالىق كومەك قۇجاتتاعى بەلگىلەنگەن مەرزىمدە كورسەتىلىپ، ول اياقتالعاندا ازامات تىركەۋدەن شىعارىلادى.
«ەاەق مۇشە مەملەكەتتەرىنەن كەلگەن ەڭبەك بوسقىندارىنا دا العاشقى مەديتسينالىق كومەك قىزمەتىن الۋ ءۇشىن ەرىكتى مەديتسينالىق ساقتاندىرۋ قاجەت. ەمحاناعا تىركەلۋ ءۇشىن ارىز بەن جەكە كۋالىگى نەمەسە شەتەل تولقۇجاتى ۇسىنىلادى. مەديتسينالىق مەكەمەگە ارىز بەرۋشى ءوزى نە ەرىكتى مەديتسينالىق ساقتاندىرۋ بويىنشا كەلىسىمشارتقا تۇرعان ساقتاندىرۋ ۇيىمىنىڭ وكىلى بەرە الادى»، دەيدى
«الەۋمەتتىك مەديتسينالىق ساقتاندىرۋ قورى » كەاق شىمكەنت قالاسى بويىنشا فيليالىنىڭ ديرەكتورى ءسابيت قۇرالبەك.
مەديتسينالىق ساقتاندىرۋ جۇيەسى بويىنشا شىمكەنتتە العاشقى مەديتسيانلىق كومەكتى 41 مەديتسينالىق ۇيىمدا كورسەتىلەدى. ولاردىڭ 14-ءى مەملەكەتتىك ەمحانالار بولسا، قالعاندارى جەكەمەنشىك.
№1 قالالىق ەمحاناسىنا الەۋمەتتىك مەديتسينالىق ساقتاندىرۋ جۇيەسى بويىنشا شەتەل ازاماتتارى دارىگەرلەر كومەگىنە جۇگىنبەگەن جانە ەمحاناعا تىركەلۋگە شاعىم تۇسىرمەگەن.
ايتا كەتەتىن ءجايت كەپىلدى مەديتسينالىق كومەك الۋ ءۇشىن ەلىمىزدە 15 قىركۇيەكتەن باستاپ ەرىكتى تۇردە مەديتسينالىق ۇيىمدارعا تىركەلۋ ناۋقانى باستالادى. قازىر حالىق اراسىندا ءتۇسىندرۋ جۇمىستارى جۇرگىزىلۋدە. زەينەتكەر ليۋدميلا جۋكوۆا ءوزىمنىڭ ۇيرەنگەن ەمحانامدا قايتا تىركەلەمىن دەپ وتىر. ويتكەنى كوپ جىلداردان بەرى وسىندا تەگىن مەديتسينالىق كومەكتى الىپ كەلەمىن دەيدى قالا تۇرعىنى.
ەمحاناعا تىركەلەمىن دەسەڭىزدەر ەلەكتروندىق ۇكىمەت ۆەب-پورتالى ارقىلى «دەنساۋلىق» بولىگىنە كىرىپ، «العاشقى مەديكالىق-سانيتارلىق كومەك كورسەتەتىن مەديتسينالىق ۇيىمعا تىركەۋ» قىزمەتىن تاڭدايسىز. ونداعى بەتتى تولتىرىپ مەديتسينالىق ۇيىمعا ارىز بەرەسىز.
پاتسيەنتتەر تۋرالى مالىمەتتەردى ەمحانالار مەملەكەتتىك اقپاراتتىق جۇيەدەن اۆتوماتتى تۇردە الادى. تىركەلگەنى جايلى حابارلاما ازاماتقا مەديتسينالىق ۇيىمنىڭ ەلەكتروندىق قولتاڭباسى قويىلعان ەلەكتروندىق قۇجات رەتىندە بەرىلەدى.
