بيىل شىمكەنتتە ەل تاۋەلسىزدىگىنىڭ 30 جىلدىعىنا وراي ءۇش مەكتەپ پايدالانۋعا بەرىلدى. ينۆەستورلار ەسەبىنەن سالىنعان قوس ءبىلىم ۇياسى وقۋشىلار ءۇشىن جاڭا وقۋ جىلىندا ەسىگىن ايقارا اشقان بولاتىن. بۇگىندە بۇل مەكتەپتەردە مىڭداعان وقۋشى ءبىلىم الۋدا.
جاڭا ءبىلىم وردالارىندا ءبارى زاماناۋي تالاپقا ساي، وقۋشىلاردىڭ ءبىلىم الۋى ءۇشىن بارلىق جاعداي جاسالعان.
سايرام ەلدى مەكەنىندە ورنالاسقان بۇل ياساۋي اتىنداعى جالپى ءبىلىم بەرۋ مەكتەبىنىڭ قۇرىلىسى 2019 جىلى باستالعان. اۋەلدە بۇل جەر قاراۋسىز قالعان نىسان بولىپتى. ينۆەستور ەسەبىنەن سالىنعان مەكتەپ جاڭا وقۋ جىلىندا 2 اۋىسىم بويىنشا 1000-عا جۋىق وقۋشىنى قابىلدادى. كەز كەلگەن سىنىبى ءار پانگە لايىقتالىپ، جاڭا ديزايندا ساندەلىپ، تەحنيكامەن جابدىقتالعان.
ال قالاداعى نيزامحان سۋلايمانوۆ مەكتەبىنىڭ سىرتقى كورىنىسى ەلورداداعى اق وردانى كوز الدىڭا ەلەستەتەدى. ءدالىزدىڭ كىرە-بەرىسىنەن ەدەندەرگە ءار ءتۇرلى تانىمدىق، ءبىلىمپازداردىڭ كوكجيەگىن كەڭەيتەتىن سۋرەتتەر بەينەلەنگەن. ەكى مىڭعا جۋىق وقۋشى ءبىلىم الاتىن بۇل ءبىلىم ورداسىندا جالپى 100-دەن استام كابينەت بار بولسا، ونىڭ الپىسىندا ينتەراكتيۆتى تاقتا قويىلعان.
يۋليا سەرگەەۆا، نيزامحان سۋلايمانوۆ ورتا مەكتەبىنىڭ ديرەكتورى: "بىزگە بالالار قالانىڭ بارلىق اۋماعىنان كەلەدى. قازىرگى تاڭدا وقۋشىلاردى جاڭا وقۋ جىلىنا قابىلداۋعا دايىندىق ءجۇرىپ جاتىر. كادر ماسەلەسى بويىنشا مۇعالىمدەر ىرىكتەلۋدە. مەكتەپتىڭ اۋقىمى كەڭ، بارلىق جەرى جارىق، جىلۋمەن قامتاماسىز ەتىلگەن. وقۋشىلاردىڭ ءبىلىم الۋى ءۇشىن بارلىق جاعداي جاسالعان».
بالالارىن وسىندا بەرگەن اتا-انالار تاڭداناسىن جاسىرمايدى. مەكتەپ تولىقتاي زاماناۋي ۇلگىدە سالىنعانىن العا تارتىپ، ونىڭ وقۋشىلار ءۇشىن وڭ اسەر بەرگەنىن ايتادى.
گالينا گادجيكۋليەۆا، شىمكەنت قالاسىنىڭ تۇرعىنى: «بالامدى بۇل مەكتەپكە بەرۋىمنىڭ سەبەبى ەڭ الدىمەن بىزگە جاقىن ورنالاسقان. الدىن بولاشاق مەكتەبىنە قاتىناۋشى ەدىم. بۇل مەكتەپ ادەمى، ءزاۋلىم ەتىپ سالىنعان. ءار سىنىپتا كومپيۋتەر، ينتەراكتيۆتى تاقتا بار. بۇل ءبىزدىڭ بالالارىمىز ءۇشىن وڭ اسەرىن بەرەدى دەپ سەنەمىن. مەكتەپتىڭ ءىشىن تولىقتاي ارالاپ شىقتىم. ماعان ءبارى ۇنادى».
ەل يگىلىگى ءۇشىن ينۆەستورلار ەسەبىنەن سالىنعان بۇل 2 مەكتەپ جاڭا وقۋ جىلىندا پايدالانۋعا بەرىلدى. ال قۇرساي شاعىن اۋدانىنداعى 500 ورىندىق ءبىلىم ورداسى جۋىردا قاراشا ايىندا اشىلدى.
ايتا كەتەيىك، بۇل مەكتەپتەردىڭ بارلىعى جان باسىنا قارجىلاندىرۋ باعدارلاماسى بويىنشا جۇمىس ىستەيدى. ياعني، بالالاردىڭ ءبىلىم الۋى ءۇشىن مەملەكەت ەسەبىنەن قارجى ءبولىنىپ وتىرادى.
