شىمكەنتتە ستاليندىك قۋعىن-سۇرگىن كەزىنەن بەرى "قايتپاس" دەپ اتالاتىن جەرگە جول سالىنا باستاعان دەپ حابارلايدى "ادىرنا" ۇلتتىق پورتالى 31 ارناعا سىلتەمە جاساپ.
جەرگىلىكتى تۇرعىندار جەرلەۋ ورنىندا قۇرىلىس جۇمىستارىن جۇرگىزبەۋ تۋرالى وتىنىشپەن اكىمدىككە بىرنەشە رەت جۇگىنگەن. الايدا تۇرعىنداردىڭ سوزىنە شەنەۋنىكتەر قۇلاق اسپاعان.
"وسى جەردە، سايدا جاسىرىن اتىپ، زيالى قاۋىمدى تۇندە اكەلىپ، ولتىرگەن" — دەيدى جەرگىلىكتى تۇرعىن ولمەسحان جانىبەكوۆ.
جۇرتشىلىقتىڭ ىشىندە جول اپاتتارى بۇرىن بەيىت ورنىنا توسەلگەن جولدىڭ ۇستىندە ورىن الاتىنى تۋرالى سىبىستار بار. ال مەردىگەر مەكەمە باسشىسى الىشەر حاناليەۆتىڭ ايتۋىنشا، باس جوسپاردا بۇل جەردە قورىمدار تۋرالى مالىمەت جوق.
"ۇسىنىلعان جوبامەن جۇمىس ىستەپ جاتىرمىز. قازىر قۇرىلىستى توقتاتتىق", — دەيدى ول.
شىمكەنت قالالىق قۇرىلىس ءبولىمىنىڭ باس مامانى شاميل امانقۇلوۆ بۇل ماسەلە جان-جاقتى قاراستىرىلاتىنىن ايتتى: "جوبالاۋشىعا ۇسىنىستار بەرەمىز، وزگەرتۋلەر ەنگىزەمىز. جوبانى اۋىستىرۋعا، جىلجىتۋعا بولادى" — دەدى ول.
بەيىتتەردى قورعاۋعا تىرىسقان تۇرعىندار قازىر ۇكىمەتتەن كومەك سۇراپ جاتىر. ولار بۇل جەردى مەملەكەت قاراۋىنا الۋدى سۇراۋدا.
"ادىرنا" ۇلتتىق پورتالى
