Shymkentte stalındik qýǵyn-súrgin kezinen beri "Qaıtpas" dep atalatyn jerge jol salyna bastaǵan dep habarlaıdy "Adyrna" ulttyq portaly 31 arnaǵa silteme jasap.
Jergilikti turǵyndar jerleý ornynda qurylys jumystaryn júrgizbeý týraly ótinishpen ákimdikke birneshe ret júgingen. Alaıda turǵyndardyń sózine sheneýnikter qulaq aspaǵan.
"Osy jerde, saıda jasyryn atyp, zııaly qaýymdy túnde ákelip, óltirgen" — deıdi jergilikti turǵyn Ólmeshan Jánibekov.
Jurtshylyqtyń ishinde jol apattary buryn beıit ornyna tóselgen joldyń ústinde oryn alatyny týraly sybystar bar. Al merdiger mekeme basshysy Álisher Hanalıevtiń aıtýynsha, bas josparda bul jerde qorymdar týraly málimet joq.
"Usynylǵan jobamen jumys istep jatyrmyz. Qazir qurylysty toqtattyq", — deıdi ol.
Shymkent qalalyq qurylys bóliminiń bas mamany Shamıl Amanqulov bul másele jan-jaqty qarastyrylatynyn aıtty: "Jobalaýshyǵa usynystar beremiz, ózgertýler engizemiz. Jobany aýystyrýǵa, jyljytýǵa bolady" — dedi ol.
Beıitterdi qorǵaýǵa tyrysqan turǵyndar qazir úkimetten kómek surap jatyr. Olar bul jerdi memleket qaraýyna alýdy suraýda.
"Adyrna" ulttyq portaly
