نۇر-سۇلتاندا پوليتسەيلەر جالعا العان كولىگىن ساتقان ەر ادامدى ۇستادى، دەپ حابارلايدى "ادىرنا" ۇلتتىق پورتالى.
پوليتسەيلەرگە قالا تۇرعىنى وزىنە بەيتانىس ادام الاياقتىق جولىمەن ونىڭ كولىگىن يەمدەنىپ العانىن ايتىپ ارىزدانعان. تەرگەۋ بارىسىندا 29 جاستاعى ازامات ەكى ايعا جالعا بەرەمىن دەگەن جەلەۋمەن ءوزىنىڭ تانىسىنان رەسەيلىك ءنومىرى بار «گازەل» اۆتوكولىگىن الىپ كەتكەنى انىقتالدى، دەپ حابارلايدى قر ءىىم رەسمي سايتى.
اقشانى ءبىر-ەكى كۇندە بەرەمىن دەپ، كولىك كىلتىن الىپ، ءىزىن سۋىتقان. جەدەل ىزدەستىرۋ شارالارىنىڭ ناتيجەسىندە ەر ادام تۇرعىلىقتى جەرىندە ۇستالدى. ول كولىكتى ساتىپ ۇلگەرگەنى بەلگىلى بولدى.
اتالعان فاكتى بويىنشا «الاياقتىق» بابى بويىنشا قىلمىستىق ءىس قوزعالدى. ۇستالعان ازاماتتىڭ ەلوردا اۋماعىندا وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە.
"ادىرنا" ۇلتتىق پورتالى
