كوكشەتاۋدا بوكستان ەرلەر اراسىنداعى تۇڭعىش الەم چەمپيونى تەمىرتاس ءجۇسىپوۆتى ماراپاتتاۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
اقمولا وبلىسىنىڭ اكىمى ەرمەك مارجىقپاەۆ بوكسشىنى ءوز جەڭىسىمەن قۇتتىقتادى، دەپ حابارلادى ىشكى ساياسات باسقارماسى. قۇتتىقتاۋ ءسوزىن سويلەگەن ايماق باسشىسى وڭىردە سپورتتىق ءداستۇردىڭ بەرىك ەكەنىن، سپورتتىق قوزعالىستى دامىتۋ باعىتىندا كوپتەگەن جۇمىستار اتقارىلىپ جاتقانىن اتاپ ءوتتى.
ءبىز – اقمولالىقتار – تەمىرتاستىڭ جەڭىسىمەن ماقتانامىز! ول ءسوزسىز ءبىز ءۇشىن ماقتانىش. بۇل اقمولا وبلىسىنىڭ ەرلەر اراسىنداعى الەم چەمپيوناتىنداعى تۇڭعىش التىن مەدالى! تەمىرتاس تاجىريبەلى سپورتشى. وسى جوعارى ماراپاتقا جەتۋ جولىندا ول ەكى رەت اسكەري قىزمەتكەرلەر اراسىنداعى الەم چەمپيوناتىندا جەڭىسكە جەتتى: 2019 جىلى قىتايدىڭ ۋحان قالاسىندا جانە جاقىندا قىركۇيەكتە ماسكەۋدە وتكەن. وسى جەڭىستەردىڭ لايىقتى ناتيجەسى الەم چەمپيوناتىنىڭ التىن مەدالى يەگەرى بولدى، – دەدى ەرمەك بورانبايۇلى.
ءجۇسىپوۆ مەدالى تاۋەلسىزدىكتىڭ 30 جىلدىعىنا تەك اقمولالىقتار ءۇشىن عانا ەمەس، بۇكىل ەلىمىز ءۇشىن ەرەكشە تارتۋ بولدى. بۇل جەڭىس جاتتىقتىرۋشىلار مەن جانكۇيەرلەردىڭ ماقتانىشى بولدى، سونىمەن قاتار قازاقستاننىڭ جوعارى سپورتتىق مارتەبەسىن راستادى. ول كوپتەگەن سپورتشىلاردى جاڭا جەتىستىكتەرگە ىنتالاندىرادى جانە شابىتتاندىرادى، اسىرەسە وليمپكە دەگەن ساپارداعى سارا جولىن ەندى باستاعانداردى.
ەرمەك مارجىقپاەۆ چەمپيونعا پاتەر كىلتى مەن اقشالاي سەرتيفيكاتتى تابىس ەتتى. ول تەمىرتاستىڭ جەكە باپكەرى قۋانىشپاي كوكىشەۆتىڭ ەرەكشە ەڭبەگى مەن جوعارى كاسىبيلىگىن اتاپ ءوتتى. وعان اقشالاي سەرتيفيكات تا تابىس ەتىلدى.
تەمىرتاس ءجۇسىپوۆ جينالعان جۇرتشىلىقپەن امانداسىپ، جەرلەستەرىنىڭ وعان قالاي قارايتىنىن تۇسىنەتىنىن، سوندىقتان جەڭىسكە جەتۋ ءۇشىن بارىن سالعانىن اتاپ ءوتتى.
ءوز اتىمنان جانە اقمولا وبلىسىنىڭ سپورتشىلارى اتىنان وبلىس باسشىلىعىنا سپورتشىلاردىڭ جاتتىعىپ، جالپى سپورتتى دامىتۋعا جاعداي جاساپ جاتقانى ءۇشىن العىس ايتامىن. جارىستاردا ءسوز سويلەي وتىرىپ، جەرلەستەرىمىزدىڭ ۇلكەن قولداۋىن سەزىنىپ وتىرمىز، - دەپ العىسىن ءبىلدىردى سپورتشى.
ەسكە سالايىق، بەلگرادتا (سەربيا) وتكەن XXI الەم چەمپيوناتىندا اقمولالىق 48 كەلى سالماقتا توپ جارعان بولاتىن. شەشۋشى كەزدەسۋدە وعان تايلاند وكىلى ۆۋتتيچاي يۋراچاي قارسى شىقتى.
"ادىرنا" ۇلتتىق پورتالى
