Bokstan álem chempıony Temirtas Júsipovke páter kilti tabystaldy

2809
Adyrna.kz Telegram

Kókshetaýda bokstan erler arasyndaǵy tuńǵysh álem chempıony Temirtas Júsipovti marapattaý rásimi ótti, dep habarlaıdy "Adyrna" ulttyq portaly. 

Aqmola oblysynyń ákimi Ermek Marjyqpaev boksshyny óz jeńisimen quttyqtady, dep habarlady ishki saıasat basqarmasy. Quttyqtaý sózin sóılegen aımaq basshysy óńirde sporttyq dástúrdiń berik ekenin, sporttyq qozǵalysty damytý baǵytynda kóptegen jumystar atqarylyp jatqanyn atap ótti.

Biz – aqmolalyqtar – Temirtastyń jeńisimen maqtanamyz! Ol sózsiz biz úshin maqtanysh. Bul Aqmola oblysynyń erler arasyndaǵy álem chempıonatyndaǵy tuńǵysh altyn medali! Temirtas tájirıbeli sportshy. Osy joǵary marapatqa jetý jolynda ol eki ret áskerı qyzmetkerler arasyndaǵy álem chempıonatynda jeńiske jetti: 2019 jyly Qytaıdyń Ýhan qalasynda jáne jaqynda qyrkúıekte Máskeýde ótken. Osy jeńisterdiń laıyqty nátıjesi álem chempıonatynyń altyn medali ıegeri boldy, – dedi Ermek Boranbaıuly.

Júsipov medali Táýelsizdiktiń 30 jyldyǵyna tek aqmolalyqtar úshin ǵana emes, búkil elimiz úshin erekshe tartý boldy. Bul jeńis jattyqtyrýshylar men jankúıerlerdiń maqtanyshy boldy, sonymen qatar Qazaqstannyń joǵary sporttyq mártebesin rastady. Ol kóptegen sportshylardy jańa jetistikterge yntalandyrady jáne shabyttandyrady, ásirese Olımpke degen sapardaǵy sara jolyn endi bastaǵandardy.

Ermek Marjyqpaev chempıonǵa páter kilti men aqshalaı sertıfıkatty tabys etti. Ol Temirtastyń jeke bapkeri Qýanyshpaı Kókishevtiń erekshe eńbegi men joǵary kásibıligin atap ótti. Oǵan aqshalaı sertıfıkat ta tabys etildi.

Temirtas Júsipov jınalǵan jurtshylyqpen amandasyp, jerlesteriniń oǵan qalaı qaraıtynyn túsinetinin, sondyqtan jeńiske jetý úshin baryn salǵanyn atap ótti.

Óz atymnan jáne Aqmola oblysynyń sportshylary atynan oblys basshylyǵyna sportshylardyń jattyǵyp, jalpy sportty damytýǵa jaǵdaı jasap jatqany úshin alǵys aıtamyn. Jarystarda sóz sóıleı otyryp, jerlesterimizdiń úlken qoldaýyn sezinip otyrmyz, - dep alǵysyn bildirdi sportshy.

Eske salaıyq, Belgradta (Serbııa) ótken XXI álem chempıonatynda aqmolalyq 48 keli salmaqta top jarǵan bolatyn. Sheshýshi kezdesýde oǵan Taıland ókili Výttıchaı Iýrachaı qarsy shyqty.

"Adyrna" ulttyq portaly

Pikirler