سەناتور: "ازاماتتاردىڭ قارجىلىق جاعدايى جاقسارعانشا، نەسيەنى تولەۋ مەرزىمىن شەگەرۋ كەرەك"

2034
Adyrna.kz Telegram

سەناتورلار ۇكىمەت باسشىسىنا دەپۋتاتتىق ساۋال جولداپ، نەسيە تولەي المايتىن ازاماتتاردىڭ ماسەلەسىنە قاتىستى بىرنەشە ۇسىنىس جاسادى، دەپ حابارلايدى "ادىرنا" ۇلتتىق پورتالى "Sputnik قازاقستانعا" سىلتەمە جاساپ.

دەپۋتات ءلاززات سۇلەيمەننىڭ ايتۋىنشا، الماتىداعى تراگەديا وسى سالاداعى پروبلەمانىڭ بار ەكەنىن اشىق كورسەتتى. وسىعان بايلانىستى پرەزيدەنت قاسىم-جومارت توقاەۆ بانكتەردىڭ كەپىلزات ساياساتى، مۇلىكتى باعالاۋ مەن جەكە سوت ورىنداۋشىلارىنىڭ قىزمەتى بويىنشا ناقتى ۇسىنىستاردى ەنگىزۋدى تاپسىرعان بولاتىن. ال كرەديت العان ادامنىڭ كەپىلگە قويعان مۇلكىن اۋكتسيون ارقىلى ساتۋ سالاسىندا قۇقىقتىق قايشىلىقتار بار. وعان قوسا، سىبايلاس جەمقورلىقتىڭ قاۋپى دە جوعارى بولىپ تۇر.

"وسى سالاعا باقىلاۋ جۇرگىزەتىن ۇكىمەتتىك ەمەس ۇيىمداردىڭ مالىمەتىنە سايكەس، ساۋدا-ساتتىق كەزىندە جالعان تۇلعالار ارقىلى بورىشكەردىڭ مۇلكى تومەن باعامەن ءجيى ساتىلىپ جاتادى. كەي كەزدە ءبىر ادام بىرنەشە پاتەردى ساتىپ الادى", - دەدى ل.سۇلەيمەن سەناتتىڭ جالپى وتىرىسىندا.

ال ادىلەت مينيسترلىگىنىڭ اقپاراتى بويىنشا سوت ورىنداۋشىلارى 2016 جىلدان بەرى اۋكتسيون ارقىلى 1 406 جىلجىمايتىن مۇلىكتى ساتقان. 464 بورىشكەر ۇيلەرىن وزدەرى ساتىپ، اقشاسىن قارىزدى جابۋعا سالىپتى. ال 195 بورىشكەردى ۇيدەن شىعارىپ جىبەرگەن. سونىڭ ىشىندە 74 پروتسەنتى جالعىز باسپانادا تۇرعان.

باس پروكۋراتۋرا بولسا، ەلەكتروندى ساۋدا-ساتتىقتىڭ قانشالىقتى زاڭدى وتكىزىلگەنىن تەكسەرىپ شىقتى. 2015-2018 جىلدار ارالىعىندا بانكتەر اۋكتسيونعا شىعارىلعان مۇلىكتىڭ 78 پروتسەنتىن ساتىپ العان. ولارمەن باسەكەلەس بولاتىن ەشكىم قاتىسپادى. قاتىسقان كۇننىڭ وزىندە، كوبىنەسە، بانك قىزمەتكەرلەرى بولعان. ال كەپىلگە سالىنعان مۇلىكتىڭ باعاسى ورتاشا ەسەپپەن 30 پروتسەنتكە تومەندەتىلدى. جەكە سوت ورىنداۋشىلىنىڭ ۇستىنەن ارىزدانعان ادامدار دا از ەمەس.

"وسىعان بايلانىستى ازاماتتاردىڭ كونستيتۋتسيالىق قۇقىقتارىن قورعاۋ ءۇشىن بىرنەشە ۇسىنىسىمىز بار. بىرىنشىدەن، بورىشكەر كەلىسىمشارت تالاپتارىن ورىنداي الماسا، قارجىلىق جاعدايى جاقسارعانشا قارىزدى تولەۋ مەرزىمىن شەگەرۋدىڭ ىڭعايلى مۇمكىندىگىن بەرۋ ماسەلەسىن قاراستىرعان ءجون. ەكىنشىدەن، كەپىلگە سالىنعان مۇلىكتى باعالاۋ كەزىندە ينفلياتسيا دەڭگەيىن ەسكەرۋ كەرەك. ۇشىنشىدەن، جالعىز باسپانادان شىعارىلاتىن ازاماتتاردىڭ قۇقىقتارىن قورعاۋ ماسەلەسىن رەتتەۋ قاجەت. تورتىنشىدەن، كەپىلگە سالىنعان مۇلىكتى پايدالانۋ قۇقىعىن ساقتاۋ مەن جالدامالى باسپانا بەرۋدى قاراستىرعان دۇرىس", - دەپ اتاپ كورسەتتى ل.سۇلەيمەن.

بۇدان بولەك، سەناتورلار بانكتەرگە كەپىلزاتتى ساتىپ الۋ اۋكتسيوندارىنا قاتىسۋعا تىيىم سالۋ قاجەت دەپ سانايدى. دەپۋتاتتىق ساۋال پرەمەر-مينيستر اسقار ءماميننىڭ اتىنا جولداندى.

 

"ادىرنا" ۇلتتىق پورتالى

پىكىرلەر