الماتىدا اسا قاتىگەزدىكپەن ولتىرىلگەن اياجان ەدىلوۆانىڭ ولىمىنە قاتىستى باستى سوت وتىرىسى ءوتتى. پروتسەسس جابىق ەسىك جاعدايىندا بولدى، دەپ حابارلايدى «ادىرنا» ءتىلشىسى «استانا» تەلەارناسىنا سىلتەمە جاساپ.
قالالىق سوتتىڭ مالىمدەۋىنشە، اتىشۋلى ءىستى سۋديا ەركىن مايشىنوۆ قاراعان.وتىرىستا پروكۋرورلار ايىپتاۋ اكتىسىن وقىعان، ءبىر كۋاگەردەن جاۋاپ الىنعان. مارقۇمنىڭ تۋىسقان اپكەسىنىڭ پىكىرى تىڭدالعان. جابىرلەنۋشى تاراپتىڭ قورعاۋشىسى سوت پروتسەسىنە دەيىن ايىپتالۋشى جاقتان ەشكىم كەلمەدى دەيدى. كۇدىكتىنىڭ ءوزى جابىرلەنۋشى جاقتان كەشىرىم دە سۇراماعانىن ايتادى. كىنالى قىلمىسى ءۇشىن ءومىر بويىنا باس بوستاندىعىنان ايىرۋ قاجەت دەيدى.
قادىرجان عالىمجانۇلى، جابىرلەنۋشى تاراپتىڭ قورعاۋشىسى:
– ادام ولتىرگەنى ءۇشىن ماكسيمالدى جازا 20 جىل بولسا، ادام زورلاعانى ءۇشىن 12 جىل. ءبىزدىڭ قىلمىستىق كودەكستە ءبىر ءتارتىپ بار. ەگەر بارلىق قوسىلعان قىلمىستىڭ جاۋاپكەرشىلىك ساناتتارى 25 جىلدان اساتىن بولسا، وعان ءيا 25 جىل بەرىلەدى، ءيا ءومىر باقي باس بوستاندىعىنان ايرىلادى. جەكە باسىم ءومىر باقي سۇرايمىن.
قورعاۋشى قادىرجان عالىمجانۇلىنىڭ ايتۋىنشا، اتىشۋلى ءىس شامامەن 1 جىلداي قارالادى. ەندىگى سوت وتىرىسى 3-ءشى جەلتوقساندا وتەدى.
ايتا كەتەيىك، ءدۇيىم ەلدى ءدۇر سىلكىندىرگەن وقيعا جارتى جىل بۇرىن بولعان. 19 جاستاعى اياجان كەشكى ۋاقىتتا جۇمىستان شىعىپ، ۇيىنە قايتا ورالماعان. اراعا ەكى كۇن سالىپ ونىڭ بولشەكتەلگەن دەنەسى نۇركەنت ىقشاماۋدانىنداعى پاتەردەن تابىلعان. كۇدىكتى رەتىندە تۇركىستان وبلىسىنىڭ 28 جاستاعى تۇرعىنى ۇستالعان بولاتىن.
«ادىرنا» ۇلتتىق پورتالى
