پارا الدى دەپ ايىپتالعان ءارتىس سوتتان باس بوستاندىعىنان ايىرماۋدى جانە ايىپپۇل كولەمىن مۇمكىندىگىنشە تومەندەتۋدى سۇرادى
استانا، 6 اقپان — Sputnik. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ بۇرىنعى ديرەكتورى ەرلان ءبىلال سوتتا سوڭعى ءسوزىن ايتتى، دەپ حابارلايدى Sputnik قازاقستان تىلشىسى.
ەرلان ءبىلال قر قىلمىستىق كودەكسىنىڭ 24-بابى، 3-بولىگى، 366-بابى، 2-بولىگىندە (پارا الۋعا وقتالۋ) قاراستىرىلعان قىلمىستى جاسادى دەپ ايىپتالۋدا. سوتتا ول "سەزام" شىعارماشىلىق قورىنىڭ پرەزيدەنتى بايانوۆتان 2018 جىلدىڭ 2 قاڭتارى كۇنى 600 مىڭ تەڭگە العانىن ايتتى. 4 قاڭتار كۇنى 900 مىڭ تەڭگە الىپ جاتقان جەرىنەن ۇستالعان.
ول سوڭعى سوزىندە قيىن جاعدايعا تاپ بولعانىن، كىناسىن مويىنداپ، وكىنگەنىن اتاپ ءوتتى. ءبىلال سوتتان وتباسىلىق جانە دەنساۋلىق جاعدايىن نازارعا الا وتىرىپ، باس بوستاندىعىنان ايىرماۋدى جانە مەملەكەتتىك ايىپتاۋشى سۇراعان ايىپپۇل كولەمىن مۇمكىندىگىنشە تومەندەتۋدى ءوتىندى.
سونداي-اق ول سوتتان اتاقتارى مەن ماراپتتارىن "تارتىپ الماۋدى" سۇرادى.
"شىعارماشىلىق ادامى رەتىندە قۇردىمعا كەتپەۋىم ءۇشىن، ودان ءارى جىلجۋعا كۇش تابۋ ءۇشىن مەنىڭ اتاقتارىمدى تارتىپ الماۋىڭىزدى وتىنەمىن… ", — دەدى ول.
ەرلان ءبىلال بۇرىن ەشقاشان پوليتسياعا تۇسپەگەنىن ايتا كەلە، كوز جاسىنا ەرىك بەردى.
" مەن كىنالىمىن، قاتەلەستىم، وتىنەمىن، ەگەر زاڭ بۇعان مۇمكىندىك بەرسە، بالالارىم ءۇشىن مەنى قولداپ جىبەرىڭىز. ەگەر ماعان قولداۋ كورسەتسەڭىز، ەلىمىزدىڭ يگىلىگى ءۇشىن قايتادان ەڭبەك ەتەمىن، ستۋدەنتتەرگە قايتا ساباق بەرەمىن ", — دەدى ءبىلال.
مەملەكەتتىك ايىپتاۋشى ەرلان بىلالگە جازا رەتىندە پارانىڭ الپىس ەسەلەنگەن كولەمى — 90 ميلليون تەڭگە ءوندىرۋدى سۇرادى.
قورعاۋشى تاراپ قىلمىستىق كودەكستىڭ 65-بابى بويىنشا (قاتتى وكىنۋىنە بايلانىستى قىلمىستىق جاۋاپكەرشىلىكتەن بوساتۋ) ءبىلالدى قىلمىستىق جاۋاپكەرشىلىكتەن بوساتۋ نەمەسە پروكۋرور سۇراعان ايىپپۇل كولەمىن تومەندەتۋدى سۇرادى. سونداي-اق ونىڭ ءتورت بالاسى بار ەكەنى، ونىڭ ەكەۋى كامەلەتكە تولماعانى اتالىپ ءوتتى.
ەستەرىڭىزگە سالا كەتسەك، 5 قاڭتاردا م.Əۋەزوۆ اتىنداعى اكادەميالىق قازاق دراما تەاترىنىڭ ديرەكتورى تەاتر بازاسىن بالالارعا ارنالعان مەرەكەلىك شارالاردى وتكىزۋگە جالعا بەرگەنى ءۇشىن 1,5 ميلليون تەڭگە كولەمىندە پارا الماق بولعانى انىقتالدى.
قر ەڭبەك سىڭىرگەن قايراتكەرى ەرلان ءبىلال اۋەزوۆ اتىنداعى قازاق مەملەكەتتىك اكادەميالىق دراما تەاترىن 2015 جىلدىڭ 27 ساۋىرىنەن بەرى باسقارىپ كەلگەن.
