Para aldy dep aıyptalǵan ártis sottan bas bostandyǵynan aıyrmaýdy jáne aıyppul kólemin múmkindiginshe tómendetýdi surady
ASTANA, 6 aqpan — Sputnik. Áýezov atyndaǵy qazaq memlekettik akademııalyq drama teatrynyń burynǵy dırektory Erlan Bilál sotta sońǵy sózin aıtty, dep habarlaıdy Sputnik Qazaqstan tilshisi.
Erlan Bilál QR Qylmystyq kodeksiniń 24-baby, 3-bóligi, 366-baby, 2-bóliginde (para alýǵa oqtalý) qarastyrylǵan qylmysty jasady dep aıyptalýda. Sotta ol "Sezam" shyǵarmashylyq qorynyń prezıdenti Baıanovtan 2018 jyldyń 2 qańtary kúni 600 myń teńge alǵanyn aıtty. 4 qańtar kúni 900 myń teńge alyp jatqan jerinen ustalǵan.
Ol sońǵy sózinde qıyn jaǵdaıǵa tap bolǵanyn, kinásin moıyndap, ókingenin atap ótti. Bilál sottan otbasylyq jáne densaýlyq jaǵdaıyn nazarǵa ala otyryp, bas bostandyǵynan aıyrmaýdy jáne memlekettik aıyptaýshy suraǵan aıyppul kólemin múmkindiginshe tómendetýdi ótindi.
Sondaı-aq ol sottan ataqtary men marapttaryn "tartyp almaýdy" surady.
"Shyǵarmashylyq adamy retinde qurdymǵa ketpeýim úshin, odan ári jyljýǵa kúsh tabý úshin meniń ataqtarymdy tartyp almaýyńyzdy ótinemin… ", — dedi ol.
Erlan Bilál buryn eshqashan polıııaǵa túspegenin aıta kele, kóz jasyna erik berdi.
" Men kinálimin, qatelestim, ótinemin, eger zań buǵan múmkindik berse, balalarym úshin meni qoldap jiberińiz. Eger maǵan qoldaý kórsetseńiz, elimizdiń ıgiligi úshin qaıtadan eńbek etemin, stýdentterge qaıta sabaq beremin ", — dedi Bilál.
Memlekettik aıyptaýshy Erlan Bilálge jaza retinde paranyń alpys eselengen kólemi — 90 mıllıon teńge óndirýdi surady.
Qorǵaýshy tarap Qylmystyq kodekstiń 65-baby boıynsha (qatty ókinýine baılanysty qylmystyq jaýapkershilikten bosatý) Biláldi qylmystyq jaýapkershilikten bosatý nemese prokýror suraǵan aıyppul kólemin tómendetýdi surady. Sondaı-aq onyń tórt balasy bar ekeni, onyń ekeýi kámeletke tolmaǵany atalyp ótti.
Esterińizge sala ketsek, 5 qańtarda M.Əýezov atyndaǵy akademııalyq qazaq drama teatrynyń dırektory teatr bazasyn balalarǵa arnalǵan merekelik sharalardy ótkizýge jalǵa bergeni úshin 1,5 mıllıon teńge kóleminde para almaq bolǵany anyqtaldy.
QR eńbek sińirgen qaıratkeri Erlan Bilál Áýezov atyndaǵy qazaq memlekettik akademııalyq drama teatryn 2015 jyldyń 27 sáýirinen beri basqaryp kelgen.
