پەداگوگتەردى دايارلايتىن جوو-نىڭ سانى 86-دان 50-گە دەيىن قىسقاردى. جالپى پەداگوگيكالىق باعىتتار بويىنشا ليتسەنزياعا 138 قوسىمشا قايتارىلدى، دەپ حابارلايدى "ادىرنا" ۇلتتىق پورتالى.
ەستەرىڭىزگە سالا كەتەيىك، بۇعان دەيىن مەملەكەت باسشىسى بولاشاق پەداگوگتەردى دايارلاۋ ساپاسىن قامتاماسىز ەتۋ بويىنشا كەشەندى شارالار قابىلداۋدى تاپسىرعان بولاتىن.
سوڭعى ەكى جىلدىڭ ىشىندە مينيسترلىك جوعارى وقۋ ورىندارىنا ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن ءتۇرلى مۇمكىندىكتەر جاسادى. ماسەلەن، بيىل قىركۇيەك ايىنان باستاپ جوعارى وقۋ ورىندارى وقىتۋشىلارىنىڭ جالاقىسى جوعارىلاپ، جۇمىس ىستەپ جۇرگەن جانە تاجىريبەسى مول مامانداردى بارىنشا جۇمىسقا تارتۋعا زاڭ جۇزىندە رۇقسات ەتىلدى.
سونىمەن قاتار جىل باسىنان بەرى قر بعم ەڭبەك نارىعىنىڭ زاماناۋي سۇرانىستارىنا بەيىمدەلگەن 300-دەن استام ءبىلىم بەرۋ باعدارلاماسىن ازىرلەدى. اكادەميالىق دەربەستىك بەرىلىپ، تۇلەكتەردى سەرتيفيكاتتاۋ جۇيەسى ەنگىزىلدى.
- بولاشاقتا بالالارمەن جۇمىس ىستەيتىن پەداگوگتەردىڭ بىلىكتىلىك ماسەلەسى ءبىز ءۇشىن وتە ماڭىزدى. مەكتەپتەردەگى وقۋشىلاردى ءوز ءىسىن جاقسى كورەتىن ماماندار وقىتۋى كەرەك. سوندىقتان بۇل ماسەلەدە پەداگوگتەردى دايارلايتىن جوعارى وقۋ ورىندارىنىڭ سانىنا ەمەس، ولاردىڭ جۇمىس ساپاسىنا باسا نازار اۋدارعان ءجون. ىمىراعا كەلۋ دەگەن بولمايدى. ەلىمىزدە بولاشاق مۇعالىمدەردى ساپالى دايارلايتىن جوعارى وقۋ ورىندارى بار. الايدا، كەيبىر ۋنيۆەرسيتەتتەردەگى تەكسەرۋ ناتيجەلەرى كوڭىل كونشىتپەيدى جانە ۋنيۆەرسيتەتتەردىڭ بارلىعى بىردەي تالاپتارعا سايكەس كەلە بەرمەيتىنىن كورسەتەدى. مينيسترلىك ءبىلىم بەرۋ قىزمەتتەرىنىڭ ساپاسىن سايكەستەندىرۋگە ۋاقىت بەرەدى. ەگەر جوعارى وقۋ ورنى ساپانى جاقسارتۋ بويىنشا جۇمىس جۇرگىزبەسە، ءبىز قاتاڭ شارالار قابىلدايمىز. اتاپ ايتساق، ليتسەنزيادان ايىرامىز. مىسالى، قازىرگى تاڭدا ەلىمىزدە پەداگوگتەردى دايىندايتىن جوعارى وقۋ ورىندارى از. ەسەسىنە پەداگوگتەردى باسەكەگە قابىلەتتى ۋنيۆەرسيتەتتەر دايىندايدى. ۋاقىت وتە كەلە بۇل وڭ ناتيجە بەرەدى،— دەپ اتاپ ءوتتى قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
"ادىرنا" ۇلتتىق پورتالى
