اقتاۋ قالاسىندا 7 قاراشا كۇنى جەرگىلىكتى ۋاقىت بويىنشا ساعات 21.18 مينۋتتا 29 "ا" شاعىن اۋدانىنداعى "شەرقالا" كەشەنىندە ورنالاسقان ەكى قاباتتى "ايانات" ءدامحاناسى جارىلدى، دەپ حابارلايدى "ادىرنا" ۇلتتىق پورتالى.
ماڭعىستاۋ وبلىستىق اكىمدىگىنە قاراستى قوعامدىق كوممۋنيكاتسيا ورتالىعىنىڭ حابارلاۋىنشا، قازىر جارىلىس اۋماعىندا 18 تەحنيكا مەن 50-گە جۋىق قىزمەتكەر جۇمىس ىستەپ جاتىر.
جارىلىس بولعان جەردە قازىر اقتاۋ قالالىق ءورت ءسوندىرۋ جانە اۆاريالىق قۇتقارۋ جۇمىستارىنىڭ 7 تەحنيكاسى مەن 22 قىزمەتكەرى، وبلىستىق پوليتسيا دەپارتامەنتىنەن 11 تەحنيكا مەن 25 قىزمەتكەرى جۇمىس ىستەۋدە.
"ماڭعىستاۋ وبلىستىق توتەنشە جاڭدايلار دەپارتامەنتىنە جەرگىلىكتى ۋاقىت بويىنشا ساعات 21.18 مينۋتتا 29 "ا" شاعىن اۋدانىنداعى "شەرقالا" كەشەنىندە ورنالاسقان ەكى قاباتتى ءدامحانادا بەلگىسىز جاعدايدا جارىلىس بولعانى جونىندە حابارلاما كەلىپ ءتۇستى. بىردەن وقيعا ورنىنا ارنايى قىزمەت وكىلدەرى جەتتى. قازىر جارىلىستىڭ سەبەبى مەن بۇلىنگەن اۋماق جانە شىعىن كولەمى انىقتالۋدا",-دەدى اقتاۋ قالالىق توتەنشە جاعدايلار باسقارماسىنىڭ باس مامانى ماقسات شاپقاتوۆ.
ايتا كەتۋ كەرەك، جارىلىس تۋرالى اقپارات الدىمەن الەۋمەتتىك جەلىلەردە تاراپ كەتتى. اسىرەسە ينستاگرام جەلىسىندە فوتولار مەن ۆيدەولار تاراپ ۇلگەرگەن. ءتىپتى اقتاۋلىق بلوگەر ازامات سارسەنباەۆ جارىلىس بولعان اۋماقتى درونمەن ۆيدەوعا تۇسىرگەن.
"ادىرنا" ۇلتتىق پورتالى.
