پسيحولوگيالىق ترەنينگتەرگە اسا ساقتىقپەن قاراۋ كەرەك. بالكىم شەتەلدەن كەلىپ بىزدەگىلەرگە ءتالىم بەرەتىندەردى ءبىر جاقسىلاپ تەكسەرىپ وتىرعان دۇرىس شىعار. سەبەبى وسىنداي پسيحولوگيالىق ترەنينگ پەن بيزنەس كۋرستاردىڭ بىرىنە بارعان جاقسى تانىستارىم قاتتى وزگەرىپ كەتتى.
باياعىدان ىستەپ جۇرگەن جۇمىستارىن تاستاپ باسقا سالاعا اۋىسقان. ءتىپتى وتباسىلىق ومىرلەرىن دە تۇبەگەيلى وزگەرتكەندەرى دە بار. جاقسى جاعىنا بولسا ءبىر ءجون عوي. بالاسىن تاستاپ كەتەتىندەرگە جۇرەگىم اۋىرادى. بۇنداي كۋرستاردا ادامنىڭ ساناسىنا "شەشىم قابىلداي ءبىل" ء"ومىرىڭدى تۇبەگەيلى وزگەرت" ء"وزىڭ ءۇشىن ءومىر ءسۇر" دەگەن سەكىلدى ۇستانىمدار سىڭىرىلەدى. اينالدىرعان ون كۇندە كۋرسقا بارعاندار شىنىمەن ادام تانىماستاي وزگەرىپ شىعا كەلەدى. قۇددى ءبىر باسقا پروگرامما ورناتىلعان وزگە ادام سەكىلدى بولىپ شىعا كەلەدى. بۇل ون كۇندىڭ كۋرس ەكى ايدان تاعى قايتالانادى. وسىلاي ءۇش-ءتورت رەت بارادى ەكەنسىڭ. تانىستارىمنىڭ ءبىرى قويماعان سوڭ مەن دە باردىم. كەڭسەكگە كىرگەننەن قايتا-قايتا سۋ بەرەدى ەكەن. ءوزىمنىڭ سۋىم بار دەپ ىشپەي قويدىم. كۋرستان وتپەس بۇرىن الدىمەن پسيحولوگ سىزبەن سۇحباتتاسادى. جۇمىسىڭىز ۇناي ما، بالا-شاعاڭىزعا كوڭىلىڭىز تولا ما، ارمانىڭىز قانداي دەگەن سياقتى ءتۇرلى سۇراقتار قويادى. مەن بارىنە بۇكپەسىز جاۋاپ بەردىم. ءوزىمنىڭ باقىتتى ەكەنىمدى ايتىپ ەدىم، الگى مامەن كەرىسىنشە "سىزدە وزىڭىزگە ىشتەي ۇنامايتىن ماسەلە بار" دەپ شىعا كەلدى. مەن بارلىق ادامدا وزىنە جاقپايتىن ماسەلە ار عوي دەسەم دە ەندى سونى شەشەيىك دەپ كەنەدەي جابىستى.
تۇسىنگەنىم، مەنىڭ ىشىمنەن ايتەۋىر ءبىر پروبلەما تاۋىپ الىپ سونى ەمدەگەن بولىپ اقشا سورۋ.
انانى ايتتى، مىنانى ايتتى اقىرى تاپپادى. سودان مەن ونىڭ وزىنە "قانشا ادامدى بايىتتىڭىزدار، تانىمالداردان كىمدەر بار، مىقتى بولساڭدار مىناداي توزىعى جەتكەن كەڭسەدە نە ىستەپ وتىرسىڭدار" دەپ ابدەن سۇراقتىڭ استىنا الدىم. ساۋالدارىما جاۋاپ بەرە العا جوق. اقىرى بىزگە بەرىلگەن وتىز مينۋت ىشىندە جان دارىگەرىنىڭ ىعىرى شىقتى. مەنەن قۇتىلۋعا اسىقتى. مەنىڭ دە كەتكىم كەلدى. سودان قايتىپ مۇنداي كۋرستارعا جولاعام جوق. بىراق بارىپ جۇرگەندەر ءالى كوپ.
"ادىرنا" ۇلتتىق پورتالى
