نۇر-سۇلتان اۋەجايى مەن "سكات" اۋە كومپانياسىنىڭ اۆياوتىن جەتىسپەۋشىلىگىنە قاتىستى مالىمدەمەلەرىنە بايلانىستى قر يندۋستريا جانە ينفراقۇرىلىمدىق دامۋ مينيسترلىگى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى "Zakon.kz-كە "سىلتەمە جاساپ.
پاۆلودار مۇناي-حيميا زاۋىتىندا (پمحز) جوندەۋ جۇمىستارىنا بايلانىستى اۆيا وتىننىڭ ىشكى نارىعىندا اۋەجايلار مەن اۋە كومپانيالارى ءۇشىن اۆياكەروسين وندىرۋگە جانە قامتاماسىز ەتۋگە بايلانىستى بەلگىلى ءبىر قيىندىقتار بار ەكەندىگى بەلگىلى بولدى. دەگەنمەن تۇراقتى جولاۋشىلار جانە جۇك رەيستەرى ۇزدىكسىز قامتاماسىز ەتىلدى. قر يدم قر ەنەرگەتيكا مينيسترلىگىمەن بىرلەسىپ، زاۋىتتاردان، جەكە كومپانيالاردان، "قازمۇنايگاز-اەرو" جشس-دان پمحز جۇمىسىن قايتا باستاعانعا دەيىن اۋە كومپانيالارى مەن اۋەجايلارعا وتىن جەتكىزۋ كەستەسىن ازىرلەدى.
بۇگىنگى تاڭدا اۋەجايلاردا 27,9 مىڭ توننا وتىن بار. 9,2 مىڭ توننا زاۋىتتاردان جونەلتىلگەن. 15,6 مىڭ تونناعا كەلىسىمشارت جاسالعان. جالپى كولەمى - 53 مىڭ توننا.
قازان ايىنىڭ سوڭىنا دەيىن مۇناي وڭدەۋ زاۋىتتارى 2 مىڭ توننا اۆياوتىن شىعارادى. ونىڭ ىشىندە نۇر-سۇلتان قالاسىنىڭ اۋەجايى ءۇشىن قوسىمشا وتىن بولىنەدى. سونداي-اق، "سكات" اۋە كومپانياسىنا شىمكەنت مۇناي وڭدەۋ زاۋىتىنان قوسىمشا اۆياكەروسين جەتكىزۋ جوسپارلانىپ وتىر.
ەلوردا اۋەجايىندا 3,1 مىڭ توننا اۆياكەروسين بار. جاقىن كۇندەرى 3,9 مىڭ توننا (3 مىڭ توننا – "قازمۇنايگاز-اەرو" جشس، 0,7 مىڭ توننا – "پەتروسان" جشس، 0,2 مىڭ توننا – East fuel) جەتكىزۋ جوسپارلانىپ وتىر. الماتى اۋەجايىنداعى وتىن قالدىعى - 5,4 مىڭ توننا. 4 مىڭ توننا جونەلتىلىپ، جولدا بارا جاتىر. 5,8 مىڭ تونناعا كەلىسىمشارت جاسالعان.
"ەير استانا" اۋە كومپانياسىندا 7,4 مىڭ توننا، "سكات" اۋە كومپانياسىندا 1,7 مىڭ توننا وتىن قالعان. 1,5 مىڭ تونناعا كەلىسىمشارت جاسالعان. تۇراقتى اۋە رەيستەر ۇزدىكسىز ورىندالا بەرەدى" - دەلىنگەن حابارلامادا.
"ادىرنا" ۇلتتىق پورتالى
