"يسلام مەملەكەتى" (رەسەيدە تىيىم سالىنعان) لاڭكەستىك توبى سودىرلارىنىڭ يراكتىڭ شىعىسىنداعى ديالا پروۆينتسياسىنداعى اۋىلعا جاساعان قارۋلى شابۋىلى سالدارىنان كەمىندە 12 ادام قازا تاۋىپ، 15-ءى جارالاندى دەپ حابارلايدى "ادىرنا" ۇلتتىق پورتالى "SHAFAQ News" اقپاراتتىق پورتالىنا سىلتەمە جاساپ.
پورتالدىڭ حابارلاۋىنشا، وقيعا ەل-ميكداديا قالاسىنا جاقىن جەردە (باعدادتان 110 شاقىرىمداي جەردە) بولعان. دايش سودىرلارى شاعىن ەر-راشاد اۋىلىندا ءبىر توپ جاستارعا شابۋىل جاساپ، سونىمەن قاتار وسى اۋىلداعى تۇرعىن ۇيلەرگە ءارتۇرلى قارۋ تۇرلەرىمەن وق اتقان. قىلمىسكەرلەرگە تويتارىس بەرگەن يراك اسكەرلەرى اۋىلعا كەلگەن سوڭ لاڭكەستەر شەگىنۋگە ءماجبۇر بولعان.
پورتالدىڭ ايماقتاعى دەرەككوزى زارداپ شەككەندەر سانى الداعى ۋاقىتتا ارتۋى مۇمكىن ەكەنىن، ويتكەنى ازىرگە زارداپ شەككەن جەرگىلىكتى تۇرعىنداردىڭ ءبىر بولىگى عانا جاقىن ماڭداعى اۋرۋحانالارعا جەتكىزىلگەنىن اتاپ ءوتتى.
دايش سودىرلارى 2014 جىلدىڭ جازىندا يراك تەرريتورياسىنىڭ ۇشتەن ءبىر بولىگىن باسىپ العان. ماۋسىم ايىندا ولار ەلدىڭ ەكىنشى ۇلكەن قالاسى — موسۋلدى باسىپ الىپ، ونى "حاليفاتتىڭ استاناسى" دەپ جاريالادى. 2015 جىلى حالىقارالىق كواليتسيانىڭ قولداۋىمەن يراك ۇكىمەتىنىڭ كۇشتەرى ەكسترەميستەر باسىپ العان ايماقتاردى ازات ەتۋ بويىنشا اۋقىمدى ناۋقان باستادى.
2017 جىلى جەلتوقساندا يراكتىڭ سول كەزدەگى پرەمەر-ءمينيسترى حەيدار ال-ابادي دايش-ءتىڭ تۇپكىلىكتى جەڭىلگەنىن مالىمدەدى. دەگەنمەن يراكتىڭ قاۋىپسىزدىك كۇشتەرى ەلدىڭ ءارتۇرلى ايماقتارىندا لاڭكەستەردىڭ استىرتىن ارەكەتىن جويۋ وپەراتسياسىن جالعاستىرۋدا، ونىڭ مۇشەلەرى قۇقىق قورعاۋ ورگاندارىنا، اسكەرگە جانە بەيبىت تۇرعىندارعا شابۋىل جاساعان.
"ادىرنا" ۇلتتىق پورتالى.
