قازىبەك يسا: ەلەكتروندى ۇكىمەتتى رەسەيگە بەرە سالۋ-تاۋەلسىزدىگىمىزگە نۇقسان ەمەس پە؟!.

986

قازاق ءمينيسترى قازاقشا سويلەسە قۋاناتىن ماسقارا جاعدايعا جەتتىك - تاۋەلسىزدىگىمىزدىڭ 30 جىلدىعىنىڭ “جەتىستىگى”…

اپتانىڭ العاشقى كۇنى، بۇگىن 25 قازاندا پارلامەنت ماجىلىسىندە ۇكىمەت ساعاتى ءوتتى.

دەپۋتاتتار الدىندا قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ب.مۋسين ەسەپ بەردى.

قر پارلامەنتى ءماجىلىسى دەپۋتاتى، “اق جول” فراكتسياسى مۇشەسى قازىبەك يسا مينيسترگە ەلدىڭ الاڭداۋشىلىعىن تۋدىرىپ وتىرعان ۇكىمەتتىڭ ەلەكتروندىق پلاتفورماسىن رەسەيدىڭ سبەربانكىنە بەرۋ ماسەلەسى جانە تسيفرلاندىرۋ سالاسىنداعى، ەگوۆ پلاتفورماسىنداعى مەملەكەتتىك ءتىلدىڭ قولدانىلۋ دەڭگەيى تۋرالى سۇراق قويدى.

قۇرمەتتى مينيستر باعدات باتىربەكۇلى!

1.قازاقستاننىڭ تسيفرلاندىرۋ دەڭگەيى جاقسى دامۋدا. وعان جاڭا ءسىزدىڭ جاساعان بايانداماڭىزدان دا كوزىمىز جەتتى. ءبىز بۇۇ-نىڭ حالىقارالىق رەيتينگى بويىنشا ونلاين-قىزمەت بويىنشا 11-ءشى ورىندا، ەلەكتروندىق ۇكىمەت بويىنشا 29 ورىندا، ەلەكتروندىق قاۋىپسىزدىگى بويىنشا 31 ورىندامىز.

ءتىپتى رەسەيدىڭ الدىندامىز! ەندەشە بۇكىل 19 ملن قازاقستاندىقتاردىڭ جەكە مالىمەتى بار مەملەكەتتىڭ ەلەكتروندىق ۇكىمەتىن تۇگەل شەت مەملەكەتكە - رەسەيدىڭ سبەربانكىنە بەرە سالۋدى قالاي تۇسىندىرەسىز؟!. بۇل بيىل 30 جىل تولىپ وتىرعان تاۋەلسىزدىگىمىزگە نۇقسان ەمەس پە؟

ءسىز “بۇل كەلىسىم شارت ەمەس، مەموراندۋم” دەيسىز، ءبارى مەموراندۋمنان باستالادى. داۋىلدىڭ الدىنداعى جەل تۇراتىنى سەكىلدى. ويتكەنى، بۇل مەموراندۋمعا ۇكىمەت باسشىسى اسقار مامين قول قويىپ وتىر عوي.

ءوزىڭىز ايتقانداي بۇل قوعامدا ۇلكەن قارسىلىق تۋعىزىپ، شۋ بولۋدا. بۇنى ءسىزدىڭ جاۋابىڭىز دا قاناعاتتاندىرا المادى. بۇعان الاڭداعان “اق جول” فراكتسياسى دەپۋتاتتىق ساۋال دا جاسادى، ونى ءوزىڭىز بىلەسىز.

2.تسيفرلاندىرۋ سالاسىن مىندەتتى تۇردە شەتەلگە بەرمەسەك، كۇن كورە المايتىن بولساق، وندا قازاقستاننان كەيىنگى ورىندا تۇرعان رەسەيگە بەرگەنشە، نەگە الدىڭعى قاتارداعى ەلدەرگە بەرمەيمىز اشىق تا ءادىل كونكۋرس جاساپ. نەگە بارلىق جاعىنان رەسەيگە بايلانىپ قالعانبىز؟!.

3.بۇل IT سەكتورىنىڭ دامۋىنا كەدەرگى كەلتىرەدى. مامانداردىڭ شەتەلگە اعىلۋىنا جول بەرەدى دەپ وتىر ساراپشىلار. ويتكەنى تاپسىرىس بەرۋشى مەملەكەتتىك جانە جەرگىلىكتى ورگانداردىڭ تاپسىرىسىن قوجايىنى شەتەلدىك پلاتفورما يەسى ءوزى بىلەدى كىمگە بەرۋدى…

4.ەگەر اقش ەرتەڭ رەسەيگە الەمدىك ەڭ الدىڭعى قاتارلى باعدارلامالارعا قول جەتكىزۋگە توسقاۋىل قويسا ءبىز قايتەمىز؟ “ەكى تۇيە سۇيكەنسە شىبىن ولەدى” دەگەندەي، شىرىلداپ، بوسقا قۇربان بولىپ كەتپەيمىز بە؟

5.ءسىز باعدات باتىربەكۇلى، ءوزىڭىز مينيستر رەتىندە مەملەكەتتىك تىلدە جاقسى سويلەيدى ەكەنسىز، راحمەت. قازىر قازاق ءمينيسترى قازاقشا سويلەسە قۋاناتىن ماسقارا جاعدايعا جەتتىك تاۋەلسىزدىگىمىزدىڭ 30 جىلدىعىنىڭ “جەتىستىگى”…

ال تسيفرلاندىرۋ سالاسىنداعى، E-gov پلاتفورماسىنداعى مەملەكەتتىك ءتىلدىڭ قولدانىلۋى دەڭگەيى قانداي؟

قازىبەك يسا

"ادىرنا" ۇلتتىق پورتالى

پىكىرلەر
رەداكتسيا تاڭداۋى