اقتوبە-اتىراۋ پويىزىندا ەر ادام جولسەرىكتى سوققىعا جىقتى، دەپ حابارلايدى "ادىرنا" ۇلتتىق پورتالى.
51 جاستاعى جولاۋشىلار پويىزىنىڭ جولسەرىگىنىڭ ارىزى اتىراۋ ستانتسياسىنداعى سىزىقتى پوليتسيا بولىمىنە كەلىپ ءتۇستى. ونىڭ ايتۋىنشا، مۇقۇر ستانتسياسىنان پويىزدىڭ مارشرۋتىندا ءوزىنىڭ قىزمەتتىك مىندەتتەرىن اتقارىپ جۇرگەندە، بەيتانىس ادام وعان جاقىنداپ، دورەكىلىك كورسەتە باستاعان. اۋىزشا جانجالدان كەيىن الگى ەر ادام دەنە جاراقاتىن سالعان.
جەدەل ىزدەستىرۋ شارالارى بارىسىندا اتىراۋ وبلىسىنىڭ 24 جاستاعى تۇرعىنى انىقتالىپ، ۇستالدى.
قازىرگى ۋاقىتتا قازاقستان رەسپۋبليكاسى قىلمىستىق كودەكسىنىڭ 293-بابى، 1-تارماعى بويىنشا ءىس جۇرگىزىلۋدە (بۇزاقىلىق), ونىڭ سانكتسياسىندا ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋ نەمەسە سول مولشەردە تۇزەۋ جۇمىستارى نەمەسە 600 ساعاتقا دەيىن قوعامدىق جۇمىستارعا تارتۋ كوزدەلگەن. سونىمەن قاتار ەكى جىلعا دەيىن باس بوستاندىعىنان ايىرۋ ۇكىمى بار، - دەلىنگەن پد ءباسپاسوز قىزمەتىندە.
"ادىرنا" ۇلتتىق پورتالى
