Nur Otan پارتياسىنىڭ سايلاۋالدى باعدارلاماسىن ورىنداۋ جونىندەگى جول كارتاسىنىڭ جۇزەگە اسىرىلۋ بارىسى وبلىس اكىمى وڭداسىن ءورازاليننىڭ توراعالىعىمەن وتكەن پارتيانىڭ ايماقتىق فيليالىنىڭ ساياسي كەڭەس بيۋروسى وتىرىسىندا تالقىلاندى. جيىندا جىل باسىنان بەرى 33 نىسان اشىلىپ، ەلدىڭ الەۋەتىن كوتەرۋگە مۇمكىندىك جاسالعانى ايتىلدى دەپ حابارلايدى "ادىرنا" ۇلتتىق پورتالى.
وتىرىسقا ساياسي كەڭەس بيۋروسىنىڭ جانە وڭىرلىك قوعامدىق كەڭەس مۇشەلەرى، وبلىستىق دەپارتامەنت، باسقارما باسشىلارى، قالا، اۋدان اكىمدەرى قاتىستى.
كۇن تارتىبىندەگى ماسەلەلەر بويىنشا پارتيانىڭ اقتوبە وبلىستىق فيليالى توراعاسىنىڭ ءبىرىنشى ورىنباسارى ەربول داناعۇلوۆ پەن وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلقاسيما سۇيىنتاەۆانىڭ بايانداماسى تىڭدالدى.
جالپى اقتوبە وبلىسىندا جول كارتاسى اياسىندا جىل باسىنان بەرى 488,1 مىڭ شارشى مەتر تۇرعىن ءۇي سالىنىپ، 26 427 جاڭا جۇمىس ورنى قۇرىلعان. باعدارلاماعا سايكەس، وڭىردە 33 نىسان اشىلدى. ونىڭ ىشىندە 3 مەكتەپ، 4 بالاباقشا 3 سپورت نىسانى، مەديتسينالىق پۋنكت پەن امبۋلاتوريا، اۋىلدىق كلۋب بار. سونداي-اق قۇرىلىس ماتەريالدارىن ءوندىرۋ زاۋىتى، ءسۇت ءوندىرۋ فەرماسى جانە ءسۇت ونىمدەرىن ءوندىرۋ تسەحى، مال بورداقىلاۋ الاڭدارى، كوكونىس ساقتاۋ قويماسى مەن جىلىجاي ىسكە قوسىلدى. تەك قاندىاعاش قالاسىنىڭ وزىندە بىرنەشە نىسان - گەمودياليز ورتالىعى، جيھاز تسەحى، سۇيىق سابىن ءوندىرۋ تسەحى، قۇرىلىس دۇكەنى، ءدارىحانا سالىنىپ، پايدالانۋعا بەرىلدى. بۇگىنگە كۇنگە دەيىن جول كارتالارىنىڭ 443 كورسەتكىشى جۇزەگە اسقان.
— جول كارتالارىنىڭ ورىندالۋىنا سايلاۋالدى باعدارلامالاردى جۇزەگە اسىرۋ اياسىندا قۇرىلعان قوعامدىق كەڭەستەر ءوز سەپتىگىن تيگىزۋدە. كەڭەس مۇشەلەرىنىڭ بارلىعى جول كارتاسىن ىسكە اسىرۋدى ۇيىمداستىرۋعا تارتىلىپ، جۇمىستارىن ساپالى اتقارىپ كەلەدى. قازىرگى تاڭدا وڭىرلىك كەڭەستەردىڭ 37 وتىرىسى جانە اۋماقتىق كەڭەستەردىڭ 288 وتىرىسى ءوتىپ، مەملەكەتتىك مەكەمەلەرگە 526 ۇسىنىس بەرىلدى. فراكتسيا جانە كەڭەس مۇشەلەرى اۋداندارعا شىعىپ، "جول كارتاسى" اياسىنداعى نىساندارعا مونيتورينگ جۇرگىزۋدە. حالىققا بەرگەن ۋادەمىزدى ساپالى ىسكە اسىرۋ قاتاڭ پارتيالىق باقىلاۋدا، - دەدى پارتيانىڭ وبلىستىق فيليالى توراعاسىنىڭ ءبىرىنشى ورىنباسارى ەربول داناعۇلوۆ.
سايلاۋالدى باعدارلاماداعى جۇمىستار وتە اۋقىمدى بولعاندىقتان قيىندىقتار مەن ماسەلەلەر دە كەزدەسۋدە. جيىندا بۇل تۋرالى اشىق ايتىلدى. پارتيانىڭ سايلاۋالدى باعدارلاماسىن جۇزەگە اسىرۋدا كەمشىلىكتەرگە جول بەرگەن اقتوبە وبلىسىنىڭ جولاۋشىلار كولىگى جانە اۆتوموبيل جولدارى باسقارماسى باسشىسى ايبەك قايىرعا، اقتوبە وبلىسىنىڭ ۆەتەريناريا باسقارماسىنىڭ باسشىسى قۇسايىن سارسەمبايعا، بايعانين اۋدانىنىڭ اكىمى قايرات وتاروۆقا پارتيالىق سوگىس جاريالاندى.
وبلىس اكىمى ەندى وسىنداي قاتەلىكتەرگە جول بەرگەن مەملەكەتتىك قىزمەتشىلەرگە قاتاڭ تارتىپتىك جازا قولدانىلاتىنىن ەسكەرتتى.
— پارتيانىڭ باس جوسپارى حالىققا قاجەتتى ناقتى جوبالاردان قۇرالعان. سوندىقتان دا ءبىز ينديكاتورلاردى ۋاقىتىندا ساپالى ورىنداۋ ارقىلى ەلدىڭ الەۋەتىن كوتەرۋگە، ءاربىر تۇرعىننىڭ ءومىر ءسۇرۋ ساپاسى مەن ءال-اۋقاتىنىڭ جاقسارۋىنا جۇمىستانۋىمىز قاجەت. ءبىزدىڭ نەگىزگى مىندەتىمىز – سايلاۋالدى ۋادەلەردى ورىنداۋ جانە سايلاۋشىلاردىڭ سەنىمىن اقتاۋ، –دەدى وڭداسىن ورازالين.
جيىندى قورىتىندىلاعان وبلىس اكىمى بارلىق اۋدان، قالا اكىمدەرى مەن باسشىلارعا بۇل ىسكە جاۋاپكەرشىلىكپەن قاراۋدى قاتاڭ تاپسىردى.
"ادىرنا" ۇلتتىق پورتالى.
