اقتاۋدا «اق بيداي» VII رەسپۋبليكالىق اۋىل سپورتى ويىندارى باستالدى

512

ءوڭىر باسشىسى نۇرلان نوعاەۆتىڭ قاتىسۋىمەن كاسپي جاعالاۋىندا VII رەسپۋبليكالىق اۋىل سپورتى ويىندارىنىڭ اشىلۋ سالتاناتى ءوتتى دەپ حابارلايدى "ادىرنا" ۇلتتىق پورتالى ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.

قر تاۋەلسىزدىگىنىڭ 30 جىلدىعىن مەرەكەلەۋ اياسىندا ۇيىمداستىرىلىعان سايىسقا قازاقستاننىڭ 14 وبلىسىنان سپورتشى قاتىسۋدا. ولار تەڭگە ءىلۋ، جامبى اتۋ، اۋدارىسپاق، قۇسبەگىلىك، ۆولەيبول، شاعىن فۋتبول، قازاق كۇرەسى، توعىزقۇمالاق، اسىق اتۋ، كىر تاسىن كوتەرۋ، ارمرەستلينگ، ۇستەل تەننيسى، جازعى پرەزيدەنتتىك كوپسايىس جانە كيكبوكسينگ سياقتى ۇلتتىق ويىنداردىڭ 14 تۇرىنەن سىنعا تۇسەدى.

اتالعان ءىس-شارانىڭ باستى ماقساتى — حالىق اراسىندا بۇقارالىق سپورتتى دامىتۋ. اۋىل سپورتىنىڭ ويىندارى 20 قازانعا دەيىن جالعاسادى.

— ەلباسى نۇرسۇلتان نازارباەۆ تۇرعىندار اراسىندا بۇقارالىق سپورتتى دامىتۋ قازاقستان حالقىنىڭ دەنساۋلىعىن جاقسارتىپ، رۋحاني كۇش بەرەتىنىن جانە ەل دامۋىنىڭ باعدارلامالىق قۇجاتتارىندا كورسەتىلگەن مەجەلەرگە جەتۋگە كومەكتەسەتىنىن بىرنەشە رەت اتاپ ءوتتى. قازاقستان حالقىنا جولداۋىندا پرەزيدەنت قاسىم-جومارت توقاەۆ تا بۇقارالىق سپورتتى دامىتۋعا قاتىستى بىرقاتار ناقتى تاپسىرمالار بەردى. ءبىزدىڭ مىندەتىمىز - تۇرعىندار ءۇشىن قولايلى جاعداي جاساپ، قولجەتىمدى سپورت ورتاسىن قۇرۋ ءۇشىن بارىنشا كۇش سالۋ، - دەدى نۇرلان نوعاەۆ.

بۇگىندە وبلىس بويىنشا 804 سپورت نىسانى جۇمىس ىستەيدى. ونىڭ 366 دەنە شىنىقتىرۋ-ساۋىقتىرۋ باعىتىنداعى ورتالىقتار، 397-ءى ءبىلىم بەرۋ ۇيىمدارىندا بولسا، 41 سپورت زالدار سپورت مەكتەپتەرىندە ورنالاسقان.

ماڭعىستاۋ وبلىسىنىڭ 2020-2025 جىلدارى اۋماقتى دامىتۋ باعدارلاماسىنا سايكەس سپورتتىق-ساۋىقتىرۋ كەشەندەرىندە 100 سپورت الاڭى مەن 10 سپورت زالىن سالۋ جوسپارلانعان. جىل سوڭىنا دەيىن وبلىستا 4 سپورت كەشەنى ەل يگىلىگىنە بەرىلەدى. سونىڭ 4-ءى بيىل جىل سوڭىنا دەيىن پايدالانۋعا بەرۋ جوسپارلانۋدا.

اتاپ ايتقاندا، جاڭاوزەن قالاسىندا دەمەۋشىلەر ەسەبىنەن اۋا تىرەۋىش قۇرىلعى بازاسىندا كوپسالالى سپورت كەشەنىنىڭ جانە ەكى سپورت انگارىنىڭ قۇرىلىسى جۇرگىزىلۋدە. تۇپقاراعان اۋدانى اقشۇقىر اۋىلىنداعى "اۋىل ەل-بەسىگى" باعدارلاماسى اياسىندا 160 ورىندىق سپورت كەشەنىنىڭ قۇرىلىسىن اعىمداعى جىلدىڭ قاراشا ايىندا اياقتاۋ جوسپارلانىپ وتىر.

 

"ادىرنا" ۇلتتىق پورتالى.

پىكىرلەر
رەداكتسيا تاڭداۋى