ىنتىماعى جاراسقان وتباسىلاردى ماراپاتتاۋ ءراسىمى مەملەكەتتىك حاتشى قىرىمبەك كوشەرباەۆتىڭ قاتىسۋىمەن ونلاين فورماتتا ءوتتى، بارلىق ايماقتار بەينەبايلانىس ارقىلى سالتاناتتى جيىنعا قوسىلدى.
پاندەمياعا بايلانىستى، ونلاين فورماتتا وتكەن ماراپاتتاۋ راسىمىندە پرەزيدەنت قاسىم – جومارت توقاەۆتىڭ قۇتتىقتاۋى وقىلدى.
«مەرەيلى وتباسى» ۇلتتىق كونكۋرسى - حالقىمىزدىڭ ءبىرتۇتاس ۇلت رەتىندە ۇيىسۋىنا نەگىز بولىپ وتىرعان، وتباسى قۇندىلىقتارىن دارىپتەيتىن ايتۋلى بايگە. بيىلعى بايقاۋ قاستەرلى تاۋەلسىزدىگىمىزدىڭ 30 جىلدىعىنا وراي ۇيىمداستىرىلۋدا. ۇرپاق بويىنداعى ادامگەرشىلىك پەن ادالدىق، ەڭبەكقورلىق پەن مەيىرىمدىلىك، ۇلتجاندىلىق پەن وتانشىلدىق سياقتى اسىل قاسيەتتەردىڭ بارلىعى ەڭ الدىمەن وتباسىندا قالىپتاسادى» دەلىنگەن قۇتتىقتاۋدا.
باستى جاڭالىق – بيىل جەڭىمپازدار ءبىرىنشى رەت 17 وبلىس بويىنشا انىقتالىپ وتىر. جانە 17 ايماق بويىنشا ۇزدىك شىققان جەڭىمپازدارعا مەملەكەت باسشىسى اتىنان 5 ميلليون تەڭگەنىڭ سەرتيفيكاتتارى سالتاناتتى جاعدايدا تابىس ەتىلدى.
ءىس-شارا اياقتالعان سوڭ ايماق باسشىسى ماحامبەت دوسمۇحامبەتوۆ رەسپۋبليكادا توپ جارعان مەرەيلى شاڭىراق - كەنجەشوۆتەردى قۇتتىقتاپ، ارنايى سىيلىقتار تابىس ەتتى.
«وتباسى – شاعىن مەملەكەت. ىنتىماعى مەن بەرەكەسى جاراسقان وزدەرىڭىزدەي وتباسىلار قوعامعا ۇلگى. قوعامداعى تىنىشتىق پەن ىنتىماقتىڭ تىرەگى» دەدى اتىراۋ وبلىسىنىڭ اكىمى ماحامبەت دوسمۇحامبەتوۆ.
رەسپۋبليكادا توپ جارعان اتىراۋلىق وتباسىنىڭ تىرەگى قۇرمانبەك كەنجەشوۆ. وتاناسى گۇلدەن مۇحامەدجانوۆا. وتاسقاندارىنا 46 جىل تولعان مەرەيلى شاڭىراق يەلەرى تەمىر جول سالاسىندا 40 جىلدان استام ۋاقىت ەڭبەك ەتكەن. جەتى بالانى ومىرگە اكەلگەن اكە مەن انا 7 نەمەرە، 9 جيەن، 2 جيەنشار ءسۇيىپ وتىر.
يساتاي اۋدانىندا تۇراتىن قاراپايىم ەڭبەك ادامدارى وسىلايشا بۇگىندە مەرەيى تاسىعان الىپ شاڭىراققا اينالىپ، ءدۇيىم ەلگە ۇلگى بولۋدا.
ەسكە سالا كەتەيىك، «مەرەيلى وتباسى» ۇلتتىق كونكۋرسى ەلباسى، تۇڭعىش پرەزيدەنت نۇرسۇلتان نازارباەۆتىڭ باستاماسىمەن جىل سايىن ءوتىپ كەلەدى. كۇنى بۇگىنگە دەيىن اتالمىش بايقاۋعا ەلىمىز بويىنشا 15 مىڭنان استام وتباسى قاتىستى. وتباسى، ۇلتتىق قۇندىلىقتاردى، اكە مەن انا، اتا مەن اجە، ۇرپاق تاربيەسى ينستيتۋتىن دارىپتەۋگە ارنالعان كونكۋرس شىن مانىندە ۇلتتىق سيپاتقا يە بولدى.
ۇلتتىق بايقاۋ جىل سايىن «وتباسى كۇنى» مەرەكەسى قارساڭىندا قورىتىندىلانىپ كەلەدى.
