الماتى وبلىسىنىڭ تۋماسى داۋرەن ءسابيتوۆ نەبارى 22 جاسىندا امەريكانىڭ ەڭ الىپ اۋەكومپانيالارىنىڭ بىرىندە ۇشقىش-ينسترۋكتور بولىپ جۇمىس ىستەيدى. ول بۇگىنگە دەيىن 900 ساعات ۇشقان دەپ حابارلايدى "ادىرنا" ۇلتتىق پورتالى "Tengrinews.kz-كە" سىلتەمە جاساپ.
ونىڭ ايتۋىنشا، اقش-تا ۇشقىشتىڭ دارەجەسىن ميل نە شاقىرىم ەمەس، ساعات انىقتايدى.
"پيلوت ەسەبىندە 900 ساعات ۇشىپپىن. بۇل جۇمىسقا شىققان ۋاقىتىم ەمەس، اۋەدەگى ەسەپ. باسقا ەلدەردە 900 ساعات ۇشۋعا 10-15 جىلىڭدى سارپ ەتۋىڭ مۇمكىن، بىراق تەك امەريكادا ەمەس. مۇندا جاسىڭا، دىنىڭە، ناسىلىڭە قارامايدى، باستى تالاپ - بىلىگىڭ مەن جاۋاپكەرشىلىك", - دەيدى ول.
داۋرەن 1999 جىلى قازاقتىڭ قاراپايىم وتباسىندا تۋعان. بالا كەزىنەن ۇشقىش بولۋدى ارمانداعان ول الماتىداعى قتل-دى ءبىتىرىپ، بىردەن امەريكاعا جول تارتادى. داۋرەن ءسابيتوۆتىڭ اكەسى دە ۇشقىش. بالا داۋرەننىڭ ماماندىق تاڭداۋىنا اكەسى عالىم زور ىقپال ەتكەن.
"2017 جىلى مەكتەپتە بىرگە وقىعان سىنىپتاستارىممەن ءبىر ۋاقىتتا اقش-تاعى كاليفورنيا شتاتىنىڭ سان-ماتەو قالاسىنا كەلدىك. دوستارىمنىڭ اراسىندا مەن عانا اۆياتسيانى تاڭدادىم. اكەم كوپ جىلدان بەرى اۆياتسيا سالاسىندا جۇمىس ىستەپ كەلەدى. 5 جاسىمدا العاش رەت ءوزىنىڭ جۇمىس ورنىنا اپارعانى ەسىمنەن كەتپەيدى. ءوز كوزىممەن الىپ ۇشاقتاردى، ولاردىڭ ارنايى دايىندىقتان ءوتۋ پروتسەسىن سول كەزدە ءبىرىنشى رەت كورسەم كەرەك. ءتىپتى، اكەممەن بىرنەشە رەت ۇشقان كەزدەرىم دە بولدى. ۇشقىشتاردىڭ كابيناسىنان عانا بايقاۋعا بولاتىن اۋەدەگى كورىنىس، كۇننىڭ شىعۋى مەن باتۋى مەنى بىردەن باۋراپ الدى. قىسقا قايىرعاندا، بولاشاقتا كىم بولاتىنىمدى 5 جاسىمدا-اق ءبىلدىم عوي", - دەيدى ول.
قازىر ول Standord Flying ارنايى وقۋ ورنىندا ءبىلىمىن جەتىلدىرىپ، جوعارى ساناتتى سەرتيفيكات الۋعا دايىندالىپ ءجۇر.
"باسقا سالانى بىلمەدىم، بىراق، ۇشقىش بولامىن دەگەن ادام كۇندەلىكتى ءوز بىلىگىن ارتتىرىپ وتىرۋى شارت. بۇگىندە Standord Flying ۇشقىشتار مەكتەبىندە قوسىمشا ءبىلىم الىپ ءجۇرمىن. اپتاسىنا بىرنەشە رەت وقۋعا جاڭا تۇسكەن ستۋدەنتتەرگە ءدارىس وقىپ، ولاردىڭ پراكتيكالىق جۇمىستارىن جۇرگىزەمىن", - دەيدى داۋرەن.
ونىڭ ايتۋىنشا، امەريكاداعى ۇشقىشتاردى دايارلايتىن وقۋ ورىندارىنىڭ باعاسى قازاقستانمەن بىردەي.
"قازىر California Airways كورپوراتسياسىندا ۇشقىش-ينسترۋكتور بولىپ جۇمىس ىستەيمىن. بەكىتىلگەن كەستەگە ساي رەيستەرگە شىعامىن، سونداي-اق الدىن الا ۇشاقتى تەستىلەۋ جۇمىسىنا قاتىسامىن. باستاپقىدا تالاپ جوعارى بولىپ، ۇيرەنىسە الماي ءجۇر ەدىم، بىراق قازىر ءوزىمدى بۇل كومپانياسىز ەلەستەتە المايمىن", - دەيدى جاس ۇشقىش.
سونىمەن قاتار، داۋرەن جەكە تاپسىرىس قابىلداپ، چارتەرلىك رەيستەردىڭ دە تىزگىنىن ۇستاپ ءجۇر. ول اقش-تا ۇشقىشتاردىڭ جالاقىسى وتە جوعارى، قارجىدان قىسىلىپ جۇرگەن ادام جوق ەكەنىن ايتادى.
"امەريكا ۇشقىشتاردىڭ ايلىعىن اياماي تولەيدى. مەنىمەن بىرگە جىلىنا 550 مىڭ دوللار تاباتىن كىسى جۇمىس ىستەيدى. ەڭ تومەن دەگەندەرى 200-250 مىڭ دوللار توڭىرەگىندە ايلىق الادى. بۇل ەندى مامانداردىڭ كاسىبي بىلىگىنە جانە تاجىريبەسىنە بايلانىستى. 5 جىلدان كەيىن مەنىڭ دە سونشالىقتى قاراجات تابۋعا مۇمكىندىگىم بار.
ال ءبىزدىڭ ەلدەگى اۋەكومپانيالاردىڭ دەڭگەيىنە كەلسەك، قالاارالىق بيلەتتەردىڭ باعاسىن كورىپ، تاڭعالدىم. وتە قىمبات دەر ەدىم. تۋرا سول باعاعا ەۋروپادا باسقا ەلدەرگە ۇشىپ جاتادى. ال اۆياتسيانىڭ وزىنە كەلەتىن بولساق، قازاقستاندا ۇشقىشتاردى دايىندايتىن اكادەميالاردى كوبەيتۋ كەرەك. تەك وقىتىپ قويماي، ۋنيۆەرسيتەتتەن كەيىن تاجىريبەدەن تەگىن وتكىزسە دەگەن تىلەك بار", - دەيدى ول.
"ادىرنا" ۇلتتىق پورتالى.
