Almaty oblysynyń týmasy Dáýren Sábıtov nebári 22 jasynda Amerıkanyń eń alyp áýekompanııalarynyń birinde ushqysh-ınstrýktor bolyp jumys isteıdi. Ol búginge deıin 900 saǵat ushqan dep habarlaıdy "Adyrna" ulttyq portaly "Tengrinews.kz-ke" silteme jasap.
Onyń aıtýynsha, AQSh-ta ushqyshtyń dárejesin mıl ne shaqyrym emes, saǵat anyqtaıdy.
"Pılot esebinde 900 saǵat ushyppyn. Bul jumysqa shyqqan ýaqytym emes, áýedegi esep. Basqa elderde 900 saǵat ushýǵa 10-15 jylyńdy sarp etýiń múmkin, biraq tek Amerıkada emes. Munda jasyńa, dinińe, násilińe qaramaıdy, basty talap - biligiń men jaýapkershilik", - deıdi ol.
Dáýren 1999 jyly qazaqtyń qarapaıym otbasynda týǵan. Bala kezinen ushqysh bolýdy armandaǵan ol Almatydaǵy QTL-dy bitirip, birden Amerıkaǵa jol tartady. Dáýren Sábıtovtiń ákesi de ushqysh. Bala Dáýrenniń mamandyq tańdaýyna ákesi Ǵalym zor yqpal etken.
"2017 jyly mektepte birge oqyǵan synyptastarymmen bir ýaqytta AQSh-taǵy Kalıfornııa shtatynyń San-Mateo qalasyna keldik. Dostarymnyń arasynda men ǵana avıaııany tańdadym. Ákem kóp jyldan beri avıaııa salasynda jumys istep keledi. 5 jasymda alǵash ret óziniń jumys ornyna aparǵany esimnen ketpeıdi. Óz kózimmen alyp ushaqtardy, olardyń arnaıy daıyndyqtan ótý proesin sol kezde birinshi ret kórsem kerek. Tipti, ákemmen birneshe ret ushqan kezderim de boldy. Ushqyshtardyń kabınasynan ǵana baıqaýǵa bolatyn áýedegi kórinis, kúnniń shyǵýy men batýy meni birden baýrap aldy. Qysqa qaıyrǵanda, bolashaqta kim bolatynymdy 5 jasymda-aq bildim ǵoı", - deıdi ol.
Qazir ol Standord Flying arnaıy oqý ornynda bilimin jetildirip, joǵary sanatty sertıfıkat alýǵa daıyndalyp júr.
"Basqa salany bilmedim, biraq, ushqysh bolamyn degen adam kúndelikti óz biligin arttyryp otyrýy shart. Búginde Standord Flying ushqyshtar mektebinde qosymsha bilim alyp júrmin. Aptasyna birneshe ret oqýǵa jańa túsken stýdentterge dáris oqyp, olardyń praktıkalyq jumystaryn júrgizemin", - deıdi Dáýren.
Onyń aıtýynsha, Amerıkadaǵy ushqyshtardy daıarlaıtyn oqý oryndarynyń baǵasy Qazaqstanmen birdeı.
"Qazir California Airways korporaııasynda ushqysh-ınstrýktor bolyp jumys isteımin. Bekitilgen kestege saı reısterge shyǵamyn, sondaı-aq aldyn ala ushaqty testileý jumysyna qatysamyn. Bastapqyda talap joǵary bolyp, úırenise almaı júr edim, biraq qazir ózimdi bul kompanııasyz elestete almaımyn", - deıdi jas ushqysh.
Sonymen qatar, Dáýren jeke tapsyrys qabyldap, charterlik reısterdiń de tizginin ustap júr. Ol AQSh-ta ushqyshtardyń jalaqysy óte joǵary, qarjydan qysylyp júrgen adam joq ekenin aıtady.
"Amerıka ushqyshtardyń aılyǵyn aıamaı tóleıdi. Menimen birge jylyna 550 myń dollar tabatyn kisi jumys isteıdi. Eń tómen degenderi 200-250 myń dollar tóńireginde aılyq alady. Bul endi mamandardyń kásibı biligine jáne tájirıbesine baılanysty. 5 jyldan keıin meniń de sonshalyqty qarajat tabýǵa múmkindigim bar.
Al bizdiń eldegi áýekompanııalardyń deńgeıine kelsek, qalaaralyq bıletterdiń baǵasyn kórip, tańǵaldym. Óte qymbat der edim. Týra sol baǵaǵa Eýropada basqa elderge ushyp jatady. Al avıaııanyń ózine keletin bolsaq, Qazaqstanda ushqyshtardy daıyndaıtyn akademııalardy kóbeıtý kerek. Tek oqytyp qoımaı, ýnıversıtetten keıin tájirıbeden tegin ótkizse degen tilek bar", - deıdi ol.
"Adyrna" ulttyq portaly.
