28 قىركۇيەكتە تۇركيا رەسپۋبليكاسى ۇلى ۇلتتىق جينالىسىنىڭ توراعاسى مۇستافا شەنتوپ پەن قازاقستان رەسپۋبليكاسى پارلامەنتى ءماجىلىسىنىڭ توراعاسى نۇرلان نىعماتۋلليننىڭ قاتىسۋىمەن حالىقارالىق تۇركى اكادەمياسى يۋنۋس ەمرە جىرلارىنىڭ تۇرىكشە-قازاقشا جيناعىن تانىستىردى.
القالى جيىنعا ەكى سپيكەرمەن بىرگە، تۇركىستان وبلىسىنىڭ اكىمى ومىرزاق شوكەەۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇركپا باس حاتشىسى التىنبەك مامايۋسۋپوۆ، تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي، قازاقستان رەسپۋبليكاسىنىڭ تۇركياداعى توتەنشە جانە وكىلەتتى ەلشىسى ەلشىسى ابزال ساپاربەكۇلى، قازاقستان مەن تۇركيا پارلامەنت دەپۋتتارى، سونداي-اق، باۋىرلاس ەلدەردىڭ مەملەكەت جانە قوعام قايراتكەرلەرى، زيالى قاۋىم وكىلدەرى قاتىستى.
سالتاناتى جيىندى تۇركى اكادەمياسىنىڭ باسشىسى دارحان قىدىرالى جۇرگىزدى.
تۇركى اكادەمياسى يۋنۋس ەمرە جانە تۇرىك ءتىلى جىلى اياسىندا باسپاعا ازىرلەگەن اتالعان بىرەگەي باسىلىمعا تانىمال قازاق اقىنى سۆەتقالي نۇرجاننىڭ ادەبي كوركەم اۋدارمالارى تۇپنۇسقا ماتىندەرمەن قاتارلاستىرا بەرىلىپ وتىر. كىتاپقا اقىن ولەڭدەرىنىڭ بۇرىن جاريالانباعان جاڭا تارجىمەلەرى دە ەندى. باعالى باسىلىمنىڭ لەنتاسىن تۇركيا ۇلى ۇلتتىق ءماجىلىسىنىڭ توراعاسى مۇستافا شەنتوپ پەن قازاقستان پارلامەنتى ءماجىلىسىنىڭ توراعاسى نۇرلان نىعماتۋللين كەستى.
تۇساۋكەسەر راسىمىنەن كەيىن ءسوز العان دوكتور مۇستافا شەنتوپ يۋنۋس ەمرە رۋحىنىڭ ءوزىنىڭ ۇستازى قوجا احمەت ياسساۋي جاتقان كيەلى تۇركىستانعا كەلۋى سيمۆوليكالىق ءمانى زور ايتۋلى وقيعا ەكەنىن اتاپ ءوتتى.
ءوز كەزەگىندە قازاقستان رەسپۋبليكاسى پارلامەنتى ءماجىلىسىنىڭ توراعاسى نۇرلان نيگماتۋللين كەلەلى جيىننىڭ ەكى ەل اراسىنداعى بەكەم باۋىرلاستىق نىعايىپ كەلە جاتقانىنىڭ ايقىن بەلگىسى ەكەنىن ايتتى.
جيىن سوڭىندا مارتەبەلى قوناقتارعا اكادەميانىڭ باعالى باسىلىمداردى تارتۋ ەتىلدى.
ايتا كەتۋ كەرەك، بيىل يۋنۋس ەمرەنىڭ دۇنيەدەن وتكەنىنە 700 جىل تولدى. وسىعان وراي تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان 2021 جىلدى «يۋنۋس ەمرە جانە تۇرىك ءتىلى جىلى» دەپ جاريالادى. يۋنەسكو ۇيىمى كەمەڭگەر اقىندى ەسكە الۋ جىلىن جاھاندىق دەڭگەيدە اتاپ وتۋگە شەشىم قابىلدادى.
