وزبەكستان پرەزيدەنتى شاۆكات ميرزيەەۆ اقتوبەدەگى قايعىلى وقيعانى حالىقتى جۇمىسپەن قامتۋ جاعدايىنىڭ جوقتىعىمەن بايلانىستىردى. بۇل تۋرالى ريا نوۆوستي باسىلىمى حابارلادى.
وزبەكستان پرەزيدەنتى جۇما كۇنى سۇرحانداريا وبلىسىنا جاساعان جۇمىس ساپارىندا حاكىم تەرمەزيدىڭ كەسەنەسىندە بولىپ، قايتىس بولعانداردىڭ رۋحىنا قۇران باعىشتادى. ونىڭ كەسەنەنى ارالاعان ءساتى تۇسىرىلگەن ۆيەدونى ەل باسشىسىنىڭ ءباسپاسوز قىزمەتى Telegram-ارناسىندا جاريالادى.
«بولعان قايعىلى وقيعا بىرنەشە شارۋانى تىندىرۋ كەرەكتىگىن بىلدىرەدى. اتاپ ايتقاندا، ءبىزدىڭ حالىق الدىندا قارىزىمىز كوپ. ادامدارعا جۇمىس ورنىن تاۋىپ بەرمەگەن سوڭ، ولار باسقا ەلدەن ىزدەۋگە ءماجبۇر»، - دەدى ميرزيەەۆ.
ەستەرىڭىزگە سالا كەتسەك، توتەنشە جاعداي 18 قاڭتاردا سامارا-شىمكەنت تراسساسىنىڭ اقتوبە وبلىسىنىڭ اۋماعىندا (وبلىس ورتالىعىنان 320 كم قاشىقتىقتا) اتالعان ەلدىڭ 57 ازاماتى وتىرعان "يكارۋس" ماركالى جولاۋشىلار كولىگى ورتەنگەن ەدى. اقتوبە وبلىسىنىڭ تجد ءباسپاسوز قىزمەتىنىڭ مالىمەتىنە سۇيەنسەك، جانىپ جاتقان اۆتوبۋستان 5 ادام شىعىپ ۇلگەرىپ، 52 ادام قايتىس بولعان.
وسى وقيعاعا بايلانىستى قر پرەزيدەنتى ن.نازارباەۆ ءور پرەزيدەنتى ش.ميرزيەەۆكە كوڭىل ايتۋ جەدەلحاتىن جىبەرگەن بولاتىن.
"ادىرنا" اقپارات
