Ózbekstan prezıdenti Shavkat Mırzıeev Aqtóbedegi qaıǵyly oqıǵany halyqty jumyspen qamtý jaǵdaıynyń joqtyǵymen baılanystyrdy. Bul týraly RIA Novostı basylymy habarlady.
Ózbekstan prezıdenti juma kúni Surhandarııa oblysyna jasaǵan jumys saparynda Hákim Termezıdiń kesenesinde bolyp, qaıtys bolǵandardyń rýhyna quran baǵyshtady. Onyń keseneni aralaǵan sáti túsirilgen vıedony el basshysynyń baspasóz qyzmeti Telegram-arnasynda jarııalady.
«Bolǵan qaıǵyly oqıǵa birneshe sharýany tyndyrý kerektigin bildiredi. Atap aıtqanda, bizdiń halyq aldynda qaryzymyz kóp. Adamdarǵa jumys ornyn taýyp bermegen soń, olar basqa elden izdeýge májbúr», - dedi Mırzıeev.
Esterińizge sala ketsek, tótenshe jaǵdaı 18 qańtarda Samara-Shymkent trassasynyń Aqtóbe oblysynyń aýmaǵynda (oblys ortalyǵynan 320 km qashyqtyqta) atalǵan eldiń 57 azamaty otyrǵan "Ikarýs" markaly jolaýshylar kóligi órtengen edi. Aqtóbe oblysynyń TJD baspasóz qyzmetiniń málimetine súıensek, janyp jatqan avtobýstan 5 adam shyǵyp úlgerip, 52 adam qaıtys bolǵan.
Osy oqıǵaǵa baılanysty QR prezıdenti N.Nazarbaev ÓR prezıdenti Sh.Mırzıeevke kóńil aıtý jedelhatyn jibergen bolatyn.
"Adyrna" aqparat
