وبلىستىق مۇمكىندىگى شەكتەۋلى جاندارعا ارنالعان رەابيليتاتسيالىق ورتالىقتا «ءۇمىت ۇزگىم كەلمەيدى» دەپ اتالعان كەش ءوتتى

2043
Adyrna.kz Telegram

وندا اقىنجاندى راۋشان رامازانقىزىنىڭ جۇرەك جاردى ولەڭ شۋماقتارى كوپشىلىك نازارىنا ۇسىنىلدى

قوستاناي وبلىستىق مۇمكىندىگى شەكتەۋلى جاندارعا ارنالعان رەابيليتاتسيالىق ورتالىقتىڭ كىتاپحاناسىندا ەمدەلىپ جاتقان جانداردىڭ ءبىرى راۋشان ابدراحمانوۆانىڭ ءوزى شىعارعان ولەڭدەرىنە ارنالعان «ءۇمىت ۇزگىم كەلمەيدى» دەپ اتالعان كەزدەسۋ كەشى ءوتتى.

راۋشان رامازانقىزى بۇرىنعى تورعاي وبلىسى قىزىل جۇلدىز دەگەن جەردە دۇنيەگە كەلگەن. بۇگىندە ارقالىق قالاسىندا عۇمىر كەشىپ جاتىر. ول 2013 جىلى جۇيكە جۇيە اۋرۋىنا شالدىعىپ، قوستاناي وبلىستىق اۋرۋحاناسىندا كوپ ۋاقىت ەم الادى. قاتەرلى جۇيكە جۇيە اۋرۋىنىڭ سالدارىنان راۋشان رامازانقىزىنىڭ ءبىر قولى يكەمگە كەلمەي قالعان. بۇگىن دە ول وسى دەرتىنە جىلىنا 2 مارتە اتالمىش رەابيليتاتسيالىق ورتالىعىندا ەم قابىلداپ ءجۇر.

بيىل جاز ايىندا وسىندا ەمدەلۋگە كەلگەن راۋشان ابدراحمانوۆا ورتالىقتىڭ كىتاپحاناسىنا ءجيى باسسۇعىپ، ەمدىك شارالاردان كەيىنگى بوس ۋاقىتىندا كىتاپ وقۋمەن اينالىسادى. ءسويتىپ، وسى مەكەمەنىڭ كىتاپحاناشىسى كەنجەگۇل مۇراتبەكوۆاعا ءوزىنىڭ ولەڭ جازاتىنى جايىندا ايتادى.

-اپامىز ماعان ءوزىم ولەڭ شىعاراتىن ەدىم، دەپ بىرنەشە شۋماقتارىن اكەلىپ ءباردى. ولەڭدەرى ماعان قاتتى ۇنادى. كەيبىرەۋلەرىنە كوڭىلىم تولقىپ، كوزىمە جاس الدىم. كەيىن بۇل كىسىنىڭ ولەڭدەرىن كوپشىلىككە تانىستىرۋدى ءجون كوردىم. راۋشان اپاعا ءسىزدىڭ ولەڭدەرىڭىزدى وسىندا جاتقان جاندارعا تانىستىرۋ ماقساتىندا كەزدەسۋ ۇيىمداستىرامىن دەگەنىمدە ول كىسى بىردەن كەلىسىمىن بەردى،-دەيدى ورتالىق كىتاپحاناشىسى كەن جەگۇل مۇراتبەكوۆا.

راۋشان اپامىزعا اقىندىق اكەسى ابدراحماننان دارىعان ەكەن. اكەسى اۋىلدا مال شارۋاشىلىعىمەن اينالىسقان قاراپايىم كىسى. كۇندەلىكتى جۇمىستان قولى بوساسا بولدى كىتابىن الىپ، وقۋعا كىرىسەدى ەكەن. اكەسىنىڭ كىتاپقۇمارلىعىن كىشكەنتايىنان كورىپ وسكەن راۋشان اپامىز دا كىتاپقا جانى قۇمار بولىپ قالىپتاسادى. بىراق جاستايىنان ولەڭ جازباعان ەكەن.

2013 جىلى قاتتى ناۋقاستان وبلىستىق اۋرۋحانادا ءبىراز ۋاقىت جاتىپ قالادى. وسى كەزدەرى اۋرۋحانادا قول-اياعى جوق مۇگەدەك بالامەن كورشىلەس بولمەدە جاتادى. كۇندەلىكتى اناسى تاماقتاندىرىپ وتىراتىن بالانىڭ بەينەسى بۇل كىسىگە ەرەكشە اسەر قالدىرعان بولار، وسى بالاعا ارناپ «مۇگەدەك» دەگەن ولەڭ جازادى. سودان بەرى راۋشان اپامىزدىڭ جۇرەگىن جارىپ شىققان ولەڭدەر سانى ارتا بەرەدى. بۇگىندە ونىڭ 20-دان استام «اناما»، «ارباداعى ارۋ»، «ارماندا قالمايىن»، «ءبىز ادامبىز» دەپ اتالاتىن ولەڭدەرى بار.

مۇمكىندىگى شەكتەۋلى جاندارعا ارنالعان رەابيليتاتسيالىق ورتالىقتا ۇيىمداستىرىلعان كەشكە راۋشان رامازانقىزىنىڭ قۇربى-قۇرداستارى قاتىسىپ، وزدەرىنىڭ جۇرەگىنە جاقىن ولەڭدەردى كوپشىلىك نازارىنا ۇسىندى.

سولاردىڭ ءبىرى قوستاناي قالاسىنىڭ تۇرعىنى باحىتجامال دوسبولوۆا. ول كىسى اقىنجاندى قۇربىسىنىڭ «مەشىت سال، باي بولساڭ» دەگەن ولەڭىن كوپشىلىكتىڭ جۇرەگىنە جەتكىزە ءبىلدى.

سونىمەن قاتار شارا بارىسىندا وبلىستىق، رەسپۋبليكالىق بايقاۋلاردىڭ جەڭىمپازى، ءانشى دينارا ناميالى اسەم اننەن شاشۋ شاشتى. كەش سوڭىندا وسىناۋ ورتالىقتا ەم الىپ جاتقان جانداردىڭ ءبىرى جىتىقارا اۋدانىنان كەلگەن مايرا مۇسىرەپوۆا قۇربىسى راۋشان رامازانقىزىنىڭ ولەڭ جولدارىنىڭ ماعىناسى تەرەڭ، ۇيقاسى كەلىسىمدى ەكەنىنە توقتالا كەلە، بولاشاقتا وسى ولەڭدەرىن جيناق رەتىن كىتاپ قىلىپ شىعارۋىنا تىلەكتەستىك ءبىلدىردى. قالامىزدىڭ ءتىپتى ەلىمىزدىڭ كەز-كەلگەن كىتاپحاناسىندا تۇراتىن تۋىندى بولسىن دەگەن اق جارما تلەگىن ءبىلدىردى.

-مەن بالا كەزدەن كىتاپ وقۋدى جانىم سۇيەتىن. قازىردە بوس ۋاقىتىمدى كىتاپ وقۋمەن وتكىزەمىن. اكەم دە كىتاپقۇمار جان. ول كىسىنىڭ دە ولەڭ جازاتىن قاسيەتى بار. سول قاسيەت ماعان دا بەرىلگەن ەكەن. جانىم قينالىپ، كوپ جىل اۋىرعان كەزدەرى ولەڭ كوكەيىمە كەلدى دە تۇردى. ءسويتىپ ويىما ورالعان شۋماقتاردى قاعاز بەتىنە تۇسىرە باستادىم. ولەڭ شىعاراتىنىمدى وتباسىم جاقسى بىلەدى. جاڭادان شىعارعان ولەڭ شۋماقتارىمدى اسىعا كۇتىپ وتىرادى. ءبىرىنشى كەزەكتە سولارعا وقۋعا بەرەمىن،-دەيدى راۋشان ابدراحمانوۆا.

بۇگىندە وعان بويىنا بىتكەن اسىل قاسيەت باسىنا تۇسكەن اۋرت دەرتپەن كۇرەسۋگە كۇش بەرەدى. اقىنجاندى اپامىزدىڭ ءجۇزى جارقىن. ەش قيىندىققا مويىماي، وتباسىنىڭ قولداۋىن كورىپ وتىرعانىنا قۋانادى. وتاعاسى تولەگەن دە جارىنىڭ اۋىر دەرتكە شالدىققان ساتىندە ۇنەمى قاسىنان تابىلىپ قولداۋ كورسەتىپ كەلەدى. قىزدارى ماقپال مەن قىمبات اناسىنىڭ قولعاناتى. ال ۇلى ابزال بولسا، اناسىنا ءاردايىم قورعان بولۋعا تىرىسادى. كىشكەنتاي نەمەرەسى جانسەرىك بولسا، اجەسىنىڭ قاناتى، كوز قۋانىشى.

مۇمكىندىگى شەكتەۋلى جاندارعا ارنالعان رەابيليتاتسيالىق ورتالىقتا ەم الىپ، جاقىن ارادا ۇيىنە اتتانعالى وتىرعان اپامىز راۋشاننىڭ بولاشاقتا ولەڭ جيناقتارىن كىتاپ قىلىپ شىعارسام، ونى كىتاپحانالارعا بەرىپ، جەرگىلىكتى تۇرعىنداردىڭ نازارىنا ۇسىنسام دەگەن ارمانى بار. ارامىزدان وسىنداي ارمان جەتەگىندە جۇرگەن جانعا دەمەۋشىلىك ەتەمىن، ءبىر كىسىگە قۋانىش سىيلايمىن دەيتىن جومارت جان تابىلىپ جاتسا نۇر ۇستىنە نۇر بولار ەدى.

اياگوز كاكىمجانوۆا

پىكىرلەر