تۇرىك ازاماتشاسى فاتما سونمەز يەمدەنگەن ماراپاتىن قازاقستاننىڭ تاۋەلسىزدىگىنىڭ وتىز جىلدىق مەرەيتويى مەن ەلباسىنىڭ ەرەن ەڭبەگىنە ارنادى.
تۇرىك ازاماتشاسى فاتما سونمەز: «مەرەيتويىڭ قۇتتى بولسىن، تۇركى الەمىنىڭ جارىق جۇلدىزى، اتاجۇرتىم – قازاقستانىم»!
تۇركيانىڭ مەديا مەن باق اسسوتسياتسياسى قوعام قايراتكەرى، تۇركىستان قالاسىنىڭ قۇرمەتتى ازاماتى فاتما سونمەزدى قازاقستان مەن تۇركيا اراسىنداعى باۋىرلاستىقتى نىعايتۋعا، سونداي-اق، كىرىككالە قالاسىنىڭ دامۋىنا قوسقان ۇلەسى ءۇشىن «جىلدىڭ ەڭ ۇزدىك ەلارالىق كوڭىل ەلشىسى» سىيلىعىمەن ماراپاتتادى.
اتالمىش ماراپات سونمەزگە «كىرىككالە قالاسىنىڭ دامۋىنا ۇلەس قوسقانداردى ماراپاتتاۋ ءراسىمى» اياسىندا «كىرىككالە قالاسىنىڭ تۇركيا مەن الەمگە اشىلعان برەندى» نوميناتسياسىندا تابىستالدى.
تۇركيانىڭ كىرىككالە شاھارىندا مەديا، بيزنەس، ساياسات جانە قوعامدىق ۇيىم كوشباسشىلارىنىڭ قاتىسۋىمەن وتكەن سالتاناتتى ماراپاتتاۋ راسىمىندە ءسوز العان فاتما سونمەز: «ماراپاتىمدى ءاردايىم ماعان قولقانات بولىپ، دەمەۋ بولىپ كەلگەن اتا-اناما، اتاجۇرتىم قازاقستاننىڭ تاۋەلسىزدىگىنىڭ وتىز جىلدىق مەرەيتويىنا، قازاقستاننىڭ تۇڭعىش پرەزيدەنتى، ەلباسى قۇرمەتتى نۇرسۇلتان نازارباەۆقا جانە ءوزىمنىڭ دە قۇرمەتتى ازاماتى بولىپ تابىلاتىن ياساۋي اتامنىڭ قاسيەتتى شاھارى – تۇركىستانعا ارنايمىن. مەرەيتويىڭ قۇتتى بولسىن، تۇركى الەمىنىڭ جارىق جۇلدىزى، اتاجۇرتىم – قازاقستانىم!»، -دەپ، يگى سوزدەرىن قازاق ەلىنە ارنادى.
تۇركىستان قالاسىنىڭ قۇرمەتتى ازاماتى، «يەرلى دۇشۇنجە» جۋرنالىنىڭ تۇراقتى اۆتورى، ياساۋي مۇراسىن ناسيحاتتاۋشى، قوعام قايراتكەرى، قازاقستان مەن تۇركيانىڭ باۋىرلاستىعىن نىعايتۋ ماقساتىندا جۇزەگە اسقان كوپتەگەن حالىقارالىق جوبالاردىڭ اۆتورى بولىپ تابىلاتىن فاتما سونمەز قازىرگى كەزدە تۇركيانىڭ كىرىككالە قالاسىنىڭ ياحشيحان اۋداندىق دەنساۋلىقساقتاۋ دەپارتامەنتىنىڭ ديرەكتورى قىزمەتىن اتقارادى.
"ادىرنا" ۇلتتىق پورتالى
