اتىراۋدا مۇناي-گاز كەشەنى قىزمەتكەرلەرى قۇرمەتتەلدى

2307
Adyrna.kz Telegram

اتىراۋ وبلىسىنىڭ اكىمى ماحامبەت دوسمۇحامبەتوۆ ءوڭىردىڭ مۇناي-گاز كەشەنى قىزمەتكەرەلەرىن سالا كۇنىمەن قۇتتىقتادى.

سالتاناتتى ءىس-شاراعا «تەڭىزشەۆرويل» جشس، NCOC, «كاسپي قۇبىر كونسورتسيۋمى» اق، «اتىراۋ مۇناي وڭدەۋ زاۋىتى» اق، «ەمبىمۇنايگاز» اق، “GPC-Investment” جشس، “KPI” جشس، "ماتەن پەترولەۋم" اق، «سازانقۇراق» جشس سىندى كومپانيالاردىڭ باسشىلارى مەن وكىلدەرى جانە ارداگەر مۇنايشىلار قاتىستى.

ايماق باسشىسى ماحامبەت دوسمۇحامبەتوۆ مۇنايدىڭ قارا شاڭىراعى سانالاتىن اتىراۋ ءوڭىرىنىڭ مۇناي-گاز سالاسىنداعى رولىنە توقتالىپ ءوتتى.
«مۇناي مەن گاز – اتىراۋدىڭ عانا ەمەس، تۇتاس جۇرتىمىزدىڭ باستى بايلىعى، التىن قازىناسى. تاۋەلسىز قازاقستاننىڭ قۋاتتى ەلگە اينالىپ، ەكونوميكالىق الەۋەتىنىڭ ارتۋىندا ەرەكشە ماڭىزعا يە. مۇناي-گاز ءوندىرىسى اتىراۋ ءۇشىن بايىرعى كاسىپ. باستاۋىن قاراشۇڭگىلدەن الاتىن «قارا التىن» ءوندىرىسى عاسىردان استام حالىق يگىلىگى ءۇشىن قىزمەت ەتۋدە. مۇناي-گاز ءوندىرىسى – ەلىمىزدىڭ بۇگىنگى الەۋەتىن قامتاماسىز ەتىپ، بولاشاق دامۋىنا نەگىز بولىپ وتىرعان ستراتەگيالىق سالا. بۇل رەتتە، اتىراۋ ءوڭىرى ماڭىزدى رولگە يە ەكەنى ءمالىم»، -دەدى.

وبلىس اكىمىنىڭ سوزىنشە، وبلىس بويىنشا مۇناي-گاز كەشەنى سالاسىندا قازىر 125 مىڭنان استام ادام قىزمەت ەتۋدە. وڭىردەگى تەڭىز، قاشاعان سىندى الىپ جوبالار ىسكە اسىرىلىپ، سونىڭ ارقاسىندا قازاقستان ەڭ ءىرى مۇناي ءوندىرۋشى ەلدەردىڭ بىرىنە اينالىپ، وتكەن جىلى الەمدە 14 ورىنعا شىققان. قازىر اتىراۋدىڭ مۇنايى الەمنىڭ 19 ەلىنە ەكسپورتتالۋدا. ول سونىمەن قاتار، تاۋەلسىزدىك جىلدارى قازاقستاننىڭ مۇناي-گاز سالاسىنا شامامەن 50 ترلن. تەنگە ينۆەستيتسيا تارتىلسا، سونىڭ جارتىسىنان استامى ياعني 28 ترلن. تەڭگەسى اتىراۋدىڭ ەنشىسىندە ەكەنىن اتاپ ءوتتى. تەك وتكەن جىلدىڭ وزىندە عانا وبلىسىمىزعا 3 ترلن. تەڭگەدەن استام ينۆەستيتسيا قۇيىلعان. ال 1991 جىلمەن سالىستىرعاندا وبلىستا مۇناي ءوندىرۋ 12 ەسەگە، گاز ءوندىرۋ 35 ەسەگە وسكەن.

ايماق باسشىسى وڭىردەگى «تەڭىزشەۆرويل» جشس، NCOC سونداي-اق «كاسپي قۇبىر كونسورتسيۋمى» اق سىندى مۇناي كومپانيالارىنىڭ ەل يگىلىگى ءۇشىن كوپتەگەن يگى ىستەر اتقارىپ جاتقانىن ايرىقشا اتاپ ءوتتى. ولاردىڭ ءوڭىردىڭ الەۋمەتتىك ينفرقۇرىلىمىن دامىتۋعا ۇلەس قوسىپ، ولاردىڭ دەمەۋشىلىگىمەن وبلىستا كوپتەگەن بالاباقشا، مەكتەپ، ەمدەۋ مەكەمەلەرى مەن حالىققا اسا قاجەتتى الەۋمەتتىك نىساندار بوي كوتەرۋدە. پاندەميا ۋاقىتىندا دا ولار مەديتسينالىق نىساندار سالىپ، قۇرال-جابدىقتار مەن جەدەل جاردەم ستانساسىنا اۆتوكولىكتەر الىپ بەرىپ، ءدارى-دارمەكتەر ارقىلى كومەكتەسكەن. بۇگىنگى تاڭدا ەكولوگيالىق باعىتتاعى جۇمىستاردا قولعا الىپ وتىرعانىن ەرەكشە اتاپ وتكەن ايماق باسشىسى كومپانيالاردىڭ باسشىلارى مەن ۇجىمىنا دا العىسىن ءبىلدىردى.

«بۇگىندە «قارا التىن» مەن «كوگىلدىر وتىننىڭ» ءوندىرىسىن ۇلعايتىپ، ۇلت قازىناسىن مولايتۋعا سۇبەلى ۇلەس قوسىپ جۇرگەن بارشا قىزمەتكەرلەرگە، سالانىڭ ارداگەرلەرىنە ايرىقشا العىسىمدى ايتامىن»،-دەدى م.دوسمۇحامبەتوۆ.

ءىس-شارادا سالادا ەلەۋلى ەڭبەك ەتىپ جۇرگەن ءبىر توپ قىزمەتكەرلەر «مۇناي سالاسىنىڭ ەڭبەك سىڭىرگەن قىزمەتكەرى» توسبەلگىسى، ەنەرگەتيكا ءمينيسترىنىڭ قۇرمەت گراموتاسىمەن، ەكولوگيا، گەولوگيا جانە تابيعي رەسۋرستار ءمينيسترىنىڭ «جەر قويناۋىن بارلاۋدىڭ ۇزدىگى»، «جەر قويناۋىنىڭ قۇرمەتتى بارلاۋشىسى» توسبەلگىلەرىمەن، سونداي-اق، اتىراۋ وبلىسى اكىمىنىڭ العىس حاتىمەن ماراپاتتالدى.

ءوز كەزەگىندە «قازمۇنايگاز» ۇك» اق باسقارۋشى توراعاسى اليك ايدارباەۆ ارىپتەستەرىن ءتول مەرەكەلەرىمەن قۇتتىقتادى. «وتىز جىلدا مۇناي-گاز ونەركاسىبى ەكونوميكانىڭ قوزعاۋشى كۇشىنە اينالدى. وسى تۇرعىدا ەگەمەن ەلىمىزدى دامىتۋعا قازاق مۇنايىنىڭ قارا شاڭىراعى اتىراۋ وبلىسىنىڭ مۇنايشىلارىنىڭ قوسقان ۇلەسى سۇبەلى»،-دەدى ا.ايدارباەۆ.

سالتاناتتى ءىس-شارادا ارداگەر مۇنايشىلارعا دا قۇرمەت كورسەتىلىپ، كەزدەسۋ سوڭى كونتسەرتتىك باعدارلاماعا ۇلاستى.

پىكىرلەر