اقتوبە وبلىسىنىڭ اكىمى وڭداسىن ورازالين قر جازۋشىلار وداعىنىڭ مۇشەلەرىمەن كەزدەستى دەپ حابارلايدى "ادىرنا" ۇلتتىق پورتالى.
"سىزدەرمەن كەزدەسىپ تۇرۋ داستۇرگە اينالعانىنا قۋانىشتىمىن. سونىڭ ارقاسىندا رۋحاني-ادامگەرشىلىك مادەنيەتتىڭ دامۋىنا قاتىستى وزەكتى سۇراقتار تالقىلانىپ، شەشىلۋدە، وسى باعىتتا كوپتەگەن جوبالار جۇزەگە اسىرىلدى",- دەدى ءوڭىر باسشىسى.
سوڭعى جىلدارى ءوڭىر مادەنيەتىنە ەرەكشە نازار اۋدارىلۋدا. ماسەلەن، ەكى جىل قاتارىنان اقتوبە وبلىسىندا رەسپۋبليكالىق ادەبي فورۋم وتكىزىلىپ كەلەدى، سونداي-اق، جەتى اتاۋلى ستيپەندياعا قوسىمشا 1 ملن تەڭگە كولەمىندە وتەجان نۇرعاليەۆ، باكىر تاجىباەۆ جانە قاجىعالي مۇحامبەتقاليەۆ ەسىمدى جازۋشىلار اتىنداعى تاعى ءۇش ستيپەنديانى تاعايىنداۋ جوسپارلانىپ وتىر. بۇدان وزگە، اقتوبە ءوڭىرىنىڭ فولكلورلىق مۋزىكاسىنىڭ انتولوگياسى شىقتى، كىتاپحانالاردىڭ ماتەريالدىق-تەحنيكالىق بازالارىن نىعايتۋ، ولاردىڭ قورىن مولايتۋ، جاس جازۋشىلاردىڭ كىتاپتارىن شىعارۋ جۇمىستارى جۇرگىزىلۋدە.
بىلتىر قالامىزدىڭ ورتالىعىندا ۇلى ويشىل، اقىن اباي قۇنانباەۆقا ەسكەرتكىش تۇرعىزىلعان بولاتىن، جىل سوڭىنا دەيىن اقىن تولەگەن ايبەرگەنوۆكە، كومپوزيتور ءشامشى قالداياقوۆقا ەسكەرتكىشتەر ورناتىلادى، سونىمەن قاتار، الاش قايراتكەرلەرىنە ارنالعان «تاۋەلسىزدىك اق تاڭى» مەموريالدىق كەشەنى اشىلادى.
وڭداسىن ورازالين اقتوبەلىك اقىن-جازۋشىلارعا العىس حاتتار مەن 160 مىڭ تەڭگە كولەمىندە اقشالاي سىياقى تابىس ەتتى. سونداي-اق اقىن، كوسەمسوزشى، رەسپۋبليكالىق "ادىرنا" ادەبي جۋرنالىنىڭ رەداكتورى مەيىرحان اقداۋلەتۇلىن مەرەيلى 70 جاسىمەن قۇتتىقتاپ، سىي-قۇرمەت كورسەتتى.
"ادىرنا" ۇلتتىق پورتالى.
