Aqtóbe oblysynyń ákimi Ońdasyn Orazalın QR Jazýshylar odaǵynyń múshelerimen kezdesti dep habarlaıdy "Adyrna" ulttyq portaly.
"Sizdermen kezdesip turý dástúrge aınalǵanyna qýanyshtymyn. Sonyń arqasynda rýhanı-adamgershilik mádenıettiń damýyna qatysty ózekti suraqtar talqylanyp, sheshilýde, osy baǵytta kóptegen jobalar júzege asyryldy",- dedi óńir basshysy.
Sońǵy jyldary óńir mádenıetine erekshe nazar aýdarylýda. Máselen, eki jyl qatarynan Aqtóbe oblysynda respýblıkalyq ádebı forým ótkizilip keledi, sondaı-aq, jeti ataýly stıpendııaǵa qosymsha 1 mln teńge kóleminde Ótejan Nurǵalıev, Bákir Tájibaev jáne Qajyǵalı Muhambetqalıev esimdi jazýshylar atyndaǵy taǵy úsh stıpendııany taǵaıyndaý josparlanyp otyr. Budan ózge, Aqtóbe óńiriniń folklorlyq mýzykasynyń antologııasy shyqty, kitaphanalardyń materıaldyq-tehnıkalyq bazalaryn nyǵaıtý, olardyń qoryn molaıtý, jas jazýshylardyń kitaptaryn shyǵarý jumystary júrgizilýde.
Byltyr qalamyzdyń ortalyǵynda uly oıshyl, aqyn Abaı Qunanbaevqa eskertkish turǵyzylǵan bolatyn, jyl sońyna deıin aqyn Tólegen Aıbergenovke, kompozıtor Shámshi Qaldaıaqovqa eskertkishter ornatylady, sonymen qatar, Alash qaıratkerlerine arnalǵan «Táýelsizdik aq tańy» memorıaldyq kesheni ashylady.
Ońdasyn Orazalın aqtóbelik aqyn-jazýshylarǵa Alǵys hattar men 160 myń teńge kóleminde aqshalaı syıaqy tabys etti. Sondaı-aq aqyn, kósemsózshi, respýblıkalyq "Adyrna" ádebı jýrnalynyń redaktory Meıirhan Aqdáýletulyn mereıli 70 jasymen quttyqtap, syı-qurmet kórsetti.
"Adyrna" ulttyq portaly.
