تاجىريبە اياسىندا ماسكەۋ مەتروسىندا وزبەك جانە تاجىك تىلدەرىندەگى بەلگىلەر پايدا بولدى، دەپ حابارلايدى "ادىرنا" ۇلتتىق پورتالى.
بۇل جاڭالىق ازىرگە ماسكەۋ مەتروسىنىڭ بۋتوۆسكايا جەلىسىنىڭ "لەسوپاركوۆايا" ستانتسياسىندا عانا جۇزەگە اسىرىلدى. مەتروپوليتەننىڭ باسقا ستانتسيالارىندا ماتىندىك كورسەتكىشتەردىڭ "كلاسسيكالىق" نۇسقالارى – ورىس جانە اعىلشىن تىلدەرىندە ساقتالعان.
دەرەككوزدە ەكى شەت تىلىندە ناۆيگاتسيا ستانتسيانىڭ ەسىگىندە پايدا بولعانىن كورسەتەتىن فوتوسۋرەت ورنالاستىرىلدى. جازۋلاردىڭ ءبىرى كيريلليتسادا، ەكىنشىسى لاتىن تىلىندە جازىلعان.
باسىلىم بۇل شارانى ەلوردادا كورشى ەلدەردەن ورىس ءتىلىن جەتىك بىلمەيتىن جۇزدەگەن مىڭ ەڭبەك ميگرانتتارى تۇرىپ، جۇمىس ىستەيتىندىگىمەن تۇسىندىرەدى.
ەستەرىڭىزگە سالا كەتەيىك، بۇعان دەيىن ماسكەۋ مەرىنىڭ ەكونوميكالىق ساياسات، مۇلىكتىك جانە جەر قاتىناستارى جونىندەگى ورىنباسارى ۆلاديمير ەفيموۆ ماسكەۋگە تاعى 200 مىڭعا جۋىق ەڭبەك ميگرانتى قاجەت ەكەنىن ايتقان.
"ادىرنا" ۇلتتىق پورتالى
