جامبىل تجد قىزمەتكەرلەرى بايزاق اۋدانىنداعى اسكەري قويمادا بولعان جارىلىستان قازا تاپقان ارىپتەستەرىن ەسكە الدى، دەپ حابارلايدى «ادىرنا» ءتىلشىسى.
جانىبەك تۇرمانوۆ – تاراز قالاسىنىڭ №1 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى، ءوز ءىسىنىڭ شەبەرى، ناعىز وت جاۋىنگەرى، اسىل جار ءارى ەكى بالانىڭ اياۋلى اكەسى.
«جانىبەك سول كۇنى كەزەكشى قاراۋىل قۇرامىندا بولعان. وقيعا ورنىنا، ياعني بايزاق اۋدانىنا العاشقىلاردىڭ ءبىرى بولىپ كەلدى. ءوزىنىڭ قىزمەتتەس دوسى ديدار ۋميرزاكوۆپەن بىرگە ءورت اۆتوتسەستەرناسىنان لافەتتىك وقپاندى قولدانىپ، ءورتتى سوندىرمەك بولعان ساتتە العاشقى جارىلىس بولعان. سول ءتۇنى ول تاراز قالاسىنداعى اۋرۋحانالاردىڭ بىرىنە جەتكىزىلدى. وسىدان كەيىن، بىرنەشە كۇننەن سوڭ ارنايى بورتپەن نۇر-سۇلتان قالاسىنىڭ تراۆموتالوگيا جانە ورتوپەديا عىلىمي-زەرتتەۋ ينستيتۋتىنا اۋىستىرىلدى. ءبىز ارىپتەسىمىزدىڭ ورتامىزعا ورالۋىن كۇتكەن ەدىك. بىراق وكىنىشكە قاراي، 2021 جىلدىڭ 11 قىركۇيەگىندە تاڭعى 4-تە ول مىنا جارىق دۇنيەمەن قوش ايتىسىپ كەتە باردى.
ءبىز ءۇشىن جانىبەك ءوزىنىڭ جارقىن كۇلكىسىمەن ەستە قالارى انىق. ونى "دجوني" دەپ ەركەلۋشى ەدىك. ارقايسىسىمىزعا كەرەمەت دوس بولا ءبىلدى»،– دەپ جازدى ءباسپاسوز قىزمەتى.
جولداستارىنىڭ ايتۋىنشا، جانىبەك ارقاشان ءورت ءسوندىرۋ ىسىندە ءبىرىنشى بولىپ، جۇمىستى جاۋاپكەرشىلىكپەن ورىنداعان. ونىڭ الداعى بولاشاققا جوسپارلارى دا كوپ بولعان.
«پوگونداعى جۇلدىزدارىن كوبەيتكىسى كەلدى. ءتىپتى جاقىن ارالىقتا وفيتسەر دە بولار ەدى. ويتكەنى، جانىبەك بيىل عانا سانكت-پەتەربۋرگ قالاسىنىڭ مەملەكەتتىك ورتكە قارسى قىزمەت ۋنيۆەرسيتەتىن بىتىگەن بولاتىن. ول ءوزىنىڭ ازاماتتىق قورعاۋ ورگاندارىنداعى قىزمەتىن 2013 جىلعى قاڭتاردا سولتۇستىك قازاقستان وبلىسىنىڭ ورتكە قارسى قىزمەت گارنيزونىندا باستادى. سودان كەيىن 2015 جىلى جامبىل وبلىسىنا اۋىستىرىلدى. وسى 6 جىلدىق ءمىنسىز قىزمەتى ءۇشىن 28 ماراپاتقا يە بولدى»،– دەپ ەسكە الدى ارىپتەستەرى.
«ادىرنا» ۇلتتىق پورتالى
