ەر ادام ليساكوۆسك قالاسىنداعى تۇرعىن ءۇيدىڭ كىرەبەرىسىندە اتىسىپ، ۇستاۋ كەزىندە ونى پوليتسيا قىزمەتكەرلەرى جاراقاتتادى.
بولجام بويىنشا جوندەۋ جۇمىستارىنا بايلانىستى كورشىلەرىمەن جانجال تۋىنداعان. ليساكوۆسك قالاسىنىڭ تۇرعىنى اڭشىلىق مىلتىقپەن كىرە بەرىسكە شىعىپ، اتىس باستاعان. ەر ادام ەكى ايەلدى جاراقاتتاعان. ونى ۇستاۋعا جەدەل-تەرگەۋ توبى شاقىرىلىپ، وقيعا ورنىنا تەز ارادا جەتكەن.
"وقيعا ورنىنا جەتكەندە كۇدىكتى پوليتسيا قىزمەتكەرلەرىنە قارسى وق اتقان، تەرگەۋ-جەدەل توبىنىڭ تەرگەۋشىسىن جارالاعان، سودان كەيىن ءۇيدىڭ كىرەبەرىسىنە كىرىپ كەتكەن. ونى ۇستاۋ كەزىندە ول پوليتسياعا وق اتۋدى جالعاستىرعان. ءۇي تۇرعىندارىنىڭ قاۋىپسىزدىگى ءۇشىن جانە كۇدىكتىنىڭ ودان ءارى زاڭسىز ارەكەتتەرىنە جول بەرمەۋ ءۇشىن پوليتسيا قارۋدى قولدانۋعا ءماجبۇر بولىپ، كۇدىكتىنى جارالاعان. وسىدان كەيىن قارۋلى ادام ءوز پاتەرىنە قاشىپ كەتكەن، كەيىن ونى قۇقىق قورعاۋ قىزمەتكەرلەرى ۇستاعان. ءۇيدىڭ كىرەبەرىسىندە وق جاراقاتى بار ەكى ايەل تابىلدى. ىشكى ىستەر ورگاندارىنىڭ قىزمەتكەرلەرى زارداپ شەككەندەرگە كومەكتەسۋ ءۇشىن بىردەن جەدەل جاردەم شاقىردى", - دەپ حابارلادى قوستاناي وبلىسىنىڭ پد.
كۇدىكتى ۇستاۋ كەزىندە اۋىر جارالانعان، كەيىن رەانيماتسيادا قايتىس بولدى. جارالانعان ايەلدەردىڭ ءبىرى كوپ قان جوعالتۋ اسەرىنەن كوز جۇمدى. قازىرگى ۋاقىتتا قاجەتتى تەرگەۋ ارەكەتتەرى جۇرگىزىلۋدە، سونىمەن قاتار پروكۋراتۋرا ورگاندارى قارۋدى قولدانۋدىڭ زاڭدىلىعى ماسەلەسىن زەرتتەپ جاتىر.
"ادىرنا" ۇلتتىق پورتالى
