بانكتەر قازاقستاندىقتاردىڭ اقشاسىن نەگىزسىز ەسەپتەن شىعارىپ وتىرعان. قارىز الۋشىلاردىڭ اقشاسى بانكتەر بەلگىلەگەن ليميتتەن جوعارى كولەمدە ەسەپتەن شىعارىلىپ وتىرىلعان، دەپ حابارلايدى «ادىرنا» ءتىلشىسى قر باس پروكۋراتۋراسىنىڭ ءباسپاسوز قىزمەتىنە سىلتەمە جاساپ.
قاداعالاۋ ورگانى بانكتەردىڭ ازاماتتاردان ولاردىڭ نەسيەلەرى مەن قارىزدارى بويىنشا ارتىق اقشا قاراجاتىن ۇستاپ قالۋ فاكتىلەرىن انىقتادى.
ەڭبەك كودەكسىندە (115-باپ) جانە «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىندا (23-باپ) تيەسىلى جالاقى مەن زەينەتاقى سوماسىنىڭ 50%-ىنان استامىن ءوندىرىپ الۋعا تىيىم سالىنعان.
الايدا بانكتەر («Kaspi Bank»، «ەۋرازيالىق بانك»، «قازاقستان حالىق بانكى»، «حوۋم كرەديت ەند فينانس بانك» اق) ازاماتتاردىڭ شوتتارىنداعى اقشالاي قاراجاتتارىن بەكىتىلگەن تىيىمنان جوعارى كولەمدە ەسەپتەن شىعارعان.
مىسالى، «Kaspi Bank» اق وسكەمەن قالاسى تۇرعىنىنىڭ ەڭبەكاقى الۋعا ارنالعان بانكتىك شوتى بويىنشا «قازاقستان حالىق بانكى» اق-عا تولەم تالابىن قويعان.
وسى تالاپ تۇسكەنگە دەيىن جۇمىس بەرۋشى اليمەنت تولەمدەرى ءۇشىن ەڭبەكاقىنىڭ جارتىسىن ۇستاعان بولاتىن. ناتيجەسىندە، بارلىق ۇستالىنعان سومالاردان كەيىن ونىڭ ەسەپ ايىرىسۋ شوتىندا نەبارى 16 مىڭ تەڭگە (25%) قالعان.
سوت شەشىمىمەن تالاپكەردىڭ پايداسىنا ارتىق ۇستالعان سوما ءوندىرىلىپ الىندى، بىراق ول ءۇشىن سوت داۋلارىنا 9 اي ۋاقىت كەتتى.
وسىنداي فاكتىلەر اقتوبە، قاراعاندى، جامبىل، قوستاناي جانە سولتۇستىك قازاقستان وبلىستارىندا انىقتالدى.
«ادىرنا» ۇلتتىق پورتالى
