يت پەن مىسىققا چيپ سالىنىپ، بارلىق مالىمەت بىرىڭعاي دەرەك بازاسىنا ەنگىزىلەدى، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
الماتىدا ءۇي جانۋارلارىنىڭ سانىن گۋمانيستىك تۇرعىدان رەتتەيتىن وسىنداي جوبا قولعا الىندى. مۇنىڭ اياسىندا قاڭعىباس يت پەن مىسىقتى ستەريليزاتسيادان دا وتكىزۋ قاراستىرىلعان. الماتىدا الداعى ءۇش جىلدا 45000 ءۇي جانۋارىنا ميكروچيپ سالۋ جوسپارلانعان. بۇل قاڭعىباس يت پەن مىسىقتىڭ سانىن ازايتۋعا، سونداي-اق ولاردىڭ جوعالىپ كەتپەۋىنە كومەكتەسەدى. ياعني، يەسىن تاۋىپ، ۇيگە قايتارۋعا مۇمكىندىك بەرمەك. ال جانۋارلار تۋرالى بارلىق مالىمەتتەر Pet Control ارنايى دەرەكتەر قورىنا ەنگىزىلەدى. بۇل باعدارلاما ۇستاپ الىنعان نەمەسە تابىلعان يت پەن مىسىقتىڭ ءجاي-كۇيىن انىقتاپ بەرەدى.
«ەگەر قاراۋسىز جۇرگەن ءيتتى ۇستاپ العان جاعدايدا ونى ۋاقىتشا ۇستاۋ يزولياتورىنا ورنالاستىرادى.سول جەردە كلينيكالىق تەكسەرۋدەن وتەدى. ءچيپىنىڭ بار-جوعىن قارايدى. Pet Control مالىمەتتەر بازاسىنان يەسىنىڭ قايدا تۇراتىنىن انىقتاپ، ونىمەن حابارلاسىپ قايتا تابىستايدى. 408-باپ بويىنشا ءۇي جانۋارىن ۇستاۋ مەن سەرۋەندەۋ ەرەجەلەرىن بۇزعان جاعدايدا جاۋاپقا تارتىلۋى دا مۇمكىن»،– دەدى قالالىق كاسىپكەرلىك جانە ينۆەستيتسيا باسقارماسى ۆەتەريناريا ءبولىمىنىڭ باسشىسى
ايگەرىم جاقسىلىق.
قاڭعىباس يت پەن مىسىقتىڭ سانىن ازايتۋعا باعىتتالعان تاعى ءبىر باعدارلاما - ستەريليزاتسيا مەن كاستراتسيا. ءۇش جىل ىشىندە بۇل پروتسەدۋرادان 28 مىڭ ءۇي جانۋارى وتەدى. ستەريليزاتسيانى جىلىنا ەكى رەت - اقپان مەن تامىز ايلارىندا جۇرگىزۋ جوسپارلانىپ وتىر.
«بىزدە وسى ماسەلەگە تۇرعىندار بەي-جاي قارايدى. يت نەمەسە مىسىعى بالالاعان سوڭ ونى كوشەگە تاستاپ كەتە بەرەدى. جاۋاپكەرشىلىك المايدى. بۇعان جول بەرمەس ءۇشىن ءۇي جانۋارلارىن ستەريليزاتسيادان وتكىزىپ وتىرۋ كەرەك. بىراق وعان كوپشىلىك اقشاسىن قيمايدى. قاڭعىباس ءۇي جانۋارلارىنىڭ باسىم بولىگى بۇرىن قولدا ۇستالعان. ولاردىڭ كوبى سەرۋەندەۋگە بوس جىبەرە سالعاندىقتان جوعالىپ كەتكەن»،– دەپ مالىمدەدى قوعامدىق قوردىڭ پرەزيدەنتى يۋليا كوۆالەنكو.
وسى جىلى ءۇي جانۋارلارىن تەگىن ستەريليزاتسيالاۋ جانە كاستراتسيالاۋ باعدارلاماسى اياسىندا 4 مىڭعا جۋىق يت پەن مىسىق قامتىلماق. وعان 50 ملن تەڭگەدەن استام قاراجات ءبولىندى. سونىمەن قاتار جانۋارلارعا قۇتىرماعا قارسى ۆاكتسينا ەگىلەدى. بۇل جۇمىستار وسى ايدىڭ ورتاسىندا باستالىپ، 2024 جىلعا دەيىن جالعاسادى. ءۇي جانۋارلارى پانالايتىن ورىندار دا نازاردان تىس قالمايدى. بۇل ماقساتقا بيۋدجەتتەن 4 ميلليوننان استام تەڭگە جۇمسالادى.
«ادىرنا» ۇلتتىق پورتالى
