اقتاۋداعى ورتا مەكتەپتەردىڭ بىرىندە باسپالداقتان ءتۇسىپ كەلە جاتقان وقۋشىلاردى توق سوققان دەپ حابارلايدى "ادىرنا" ۇلتتىق پورتالى "InAktau.kz" پورتالىنا سىلتەمە جاساپ.
وقىس وقيعا 4 قىركۇيەكتە بولعان. ەكى 5-سىنىپتىڭ وقۋشىلارى قول ۇستاسىپ، باسپالداقتان ءتۇسىپ كەلە جاتقان. بالالاردىڭ ءبىرى باسپالداقتىڭ تۇتقاسىنان ۇستاعان ساتتە ولاردى توق سوققان. مەكتەپ ديرەكتورىنىڭ ايتۋىنشا، توق قۋاتى قاتتى بولماعان.
"ۇستىنە سينتەتيكالىق كيىم كيگەندە نەمەسە كولىكتىڭ ەسىكتىڭ ۇستاعان كەزدە توق سوعادى عوي، مىنە، سونداي جاعداي ورىن العان. بالالار قورقىپ كەتىپ، كەزەكشى مۇعالىمگە ايتقان. ءبىز دەرەۋ وقيعا بولعان جەرگە باردىق", – دەيدى مەكتەپ ديرەكتورى زارەتا فاتاليەۆا.
ونىڭ سوزىنشە، باسپالداقتاعى توق قۋاتىن تەكسەرۋ ءۇشىن ارنايى مامان دا شاقىرتىلعان. قازىرگى تاڭدا بالالاردىڭ بۇل باسپالداق وتكەلىمەن ءجۇرۋى شەكتەلىپتى.
زارداپ شەككەن بالالاردى اۋرۋحاناعا الىپ بارعان. ءبىر ساعات دارىگەر باقىلاۋىنان كەيىن ولار ۇيلەرىنەن قايتارىلىپتى. اق حالاتتىلار وقۋشىلاردىڭ دەنساۋلىعىنا زيان كەلمەگەنىن جەتكىزىپتى.
ال ەلەكتريك مامانداردىڭ سوزىنشە، توق جارىق شامدارىنان سوعۋى مۇمكىن. الداعى ۋاقىتتا ۇقساس جاعداي قايتالانباس ءۇشىن باسپالداقتاعى جارىق شامدارى الىنىپتى.
"ادىرنا" ۇلتتىق پورتالى.
